Casillas nih rualtu Buffon

Italy goalkeeper Gianluigi Buffon chuan Thawhlehni zan khan Germany nen friendly match-a goal awm loa an inhnehtawk ṭumin ram tana a match 167-na a khel a, Europe-a mahni ram tana inlan hnem ber Spain keeper Iker Casillas record chu a nihrual. Kum 38-a upa keeper hian inkhelh chawlhsan lam a la ngaihtuah loh avangin Spain-a hmun chang meuh tawh lo Casillas hi a la khum ngei a rinawm.

Juventus keeper hian vawi tam save a neih hnuah minute 45-naah AC Milan rawlthar duhawm Gianluigi Donnarumma chuan a rawn thlak a, kum 17-a upa keeper hi kum 1997-a Buffon-a'n Italy tana a match hmasa ber a khelh khan a la piang lo! Italy hian hun tawp dawn lamah Andrea Belotti hmangin chakna hun ṭha nei mah se Torino striker goal shot hian post a per.

Thawhlehni zana friendly match khel ram langsar zing-ah France chuan Ivory Coast mikhualin 0-0 in an ṭin a, Paris khawpuia inkhelah hian France player-te chu inkhelh zawhah fan-ten an au el hial! France coach Didier Deschamps chuan, "Kan talbuai a, kum 2016 hriatreng nana duhawm lo tak a ni," tiin a naute khelh danah a lungawi lo hle.