Hunhlua'n Sourav Saha a hneh

Mizo rawlthar duh-awm Lalhunhlua chuan 11Even Sports TTFI National Ranking Table Tennis Championship, 2016 khelh meka men's singles second round-ah India number 4 pawh lo ni tawh Sourav Saha a hneh.

Thawhlehni zana R. Dengṭhuama Indoor Stadium-a inkhelah Hun-hlua hian India tana World Junior Championship-a silver medal lo la tawh Saha hi 11-8, 12-14, 9-11, 11-1, 11-3, 9-11, 7-11 (4-3) in a hneh a ni. Candelux Open 2016 Junior champion Hunhlua hian beiseina sang tak nen last 16 khel mah se nimin khan Tamil Nadu tlangval Nitin Thiryengadam lakah a vanduai thung.

Govt. Complex rawl-thar Hunhlua chuan, "India senior player ka hneh thei hi ka lawm a, national mai ni lo international thlenga sulhnu lo nei ṭha tawh ka hneh theih avangin ka lawm takzet. Ka tum ram thleng zo lo mah ila theihtawp ka chhuah chhunzawm dawn a, nakkumah tun aia ṭhain ka khelh chhunzawm theih ka inbeisei," tiin Vanglaini palai a hrilh.

Hunhlua hian world champion vawi nga ni tawh Peter Karlsson kaihhruainain Sweden-ah training nei tawhin kumin hi senior level-a a vawi khat in lanna a ni a, a kum a la tam loh ngaihtuahin theihna a nei sang - hun lo kal turah Mizo ti hming-
ṭha thei tura ngaih a ni.

Youth Boys lamah National champion ni tawh Lalrinpuia chuan second round-ah Chhar-bra Angad singh chu 5-11, 1-11, 14-12, 1-11 (3-1) in a hneh a, last 16-ah Soham Bhattacharya chu 6-11, 11-7, 13-11, 11-13, 12-10, 8-11, 14-16 (4-3) in hneh leh mah se Maubawk rawlthar pawh hian quarter final-ah Manav Thakkar a paltlang zo lo.