Chennaiyin chakna Jeje Jerry

Indian Super League khelh mekah Mizo hming a mawi zel - Thawhlehni zan khan Jeje Lalpekhlua leh Jerry Lalrinzuala te khelhna Chennaiyin FC chuan 2-0 in Pune City an hneh - goal khat khungtu Jeje Lalpekhlua chu 'Swift Moment of the Match' chawimawina pek niin Jerry-a'n 'Emerging Player of the Match' ah thlan a ni bawk.

Jeje-a'n goal khung turin minute 44 thleng bak a nghah a ngai lo. Mizo rawlthar Jerry-a ball cross ṭha tak chu Davide Succi-a'n a dawn hnuah Jeje tan a siamsak a, Hnahthial tlangval hian an hmahruaina goal ni turin a khung. Palermo striker hlui Succi-a'n minute 55-naah an goal hnihna khung ve lehin Pune City-in a chhanletna tur an neih theih loh avangin South Indian club an chungung zawk.

Jeje-a phur

Jeje Lalpekhlua chuan, "Goal ka khungin kan chak thei ṭhin lo a, tun ṭumah erawh hnehna kan chanpui avangin ka lawm a ni. Team pawhin phurna nasa tak kan neih belh phah a, tunah chuan semifinal luh beiseina pawh kan nei ve leh tawh a ni," tiin Vanglaini palai a hrilh.

Chennaiyin coach Marco Mate-raz-zi-a'n season ṭan tir lam match khatah Jeje leh Succi inkawptir mah se match a inbichilh hlawm vangin striker ṭha pahnih hi a inkhelh chhawk tir ṭhin a, Thawhlehni zan-ah a vawi hnih nan striker pahnih inkawpin goal an khung ve ve.

Jeje chuan, "Tunah chuan game a pawimawh chhoh tawh em avangin Succi nen hian kan inkawp char char a rinawm tawh zawk," tiin Vanglaini palai hnenah a sawi.

Hei le Jerry

Bethlehem Veng rawlthar Jerry-a'n ISL ṭantirh lamah hmun a chan beiseiawm lo mah se Chennaiyin player pawi-mawh pawl a ni der tawh a, 'Emer-ging Player of the Match' chawi-mawina vawi nga a dawng tawh.

Jeje-a'n Indian left back ṭha ber ni thei hial tura a sawi sawi Jerry chuan, "Kan chak avangin inrintawkna kan neih belh nasa a, tunah chuan semifinal chiah kan rilruah a awm tawh. Coach-in min duhsak avangin player a thlak kual nasat lai pawhin hmun ka chang reng thei a, ka lawm takzet a ni," tiin Vanglaini palai hnenah a sawi a; Bengaluru FC striker Daniel Lalhlimpuia'n Chennaiyin squad a zawm tawh thu a sawi bawk.