Chhinga Vengin BVT an ngam

Mizoram Premier League kaithar Chhinga Vengin Joy Mrong Khar Raswai leh MS Dawngliana te goal hmangin hmahruaitu Bethlehem Vengthlang FC 2-0 in an hneh a, Chawngthansanga hoten semifinal khelh beiseina an nei thar bawk.

Chhinga Veng forward Dawng-tea hian a club hlui Chanmari FC lam a goal khung nasa taka a lawm (celebrate) laiin a club hlui tho BVT lama a goal khung erawh a lawm lo a, Bawngkawn tlangval hi man of the match-ah thlan a ni.

Harhtharna

Chhinga Vengin minute hnihna lekah Joy Mrong Khar Raswai hmangin hma an hruai a, coach Chawnga'n Khasi tlangval hi a rin ngam avangin Shillong Lajong midfielder hlui hi MPL kaithar tan player pawimawh a ni.

Chawnga hote tan ṭum dang ang thoin Nigerian defender Emma Chigozie a khel ṭha a, BVT-in an tlarhnung an su hawng thei lo a ni ber. Second half-ah BVT forward Lalnunmawia'n freekick aṭangin kawh pawtin crossbar a pet per a, Chhinga Veng an him hlauh.

Minute 70-naah player ṭha danglamna a lang a, Chhinga Veng-in counter attack hmangin an chhu let a, Dawngtea-a'n goal class zet mai a khung. Result ṭha an neih loh lai pawhin Chhinga Veng mipuiin an veng club an ṭawiawm tlat a, tuna point thum an hlawhchhuahna kawngah an pawimawh.

BVT chak lo mah se hnual tur an ni lo a, goal an chhuah hma an tuar tih a lang. Ṭantu nei ṭha Lalbiaksanga Colney hote hi semifinal lut hmasa ber an ni a, Chanmari lakah pakhatna dinhmun hloh mah se match hnih khelh hmabakah insiamṭhatna hun an nei.

Eng nge an sawi?

Chhinga Veng coach Chawng-than-sanga chuan, "Kan khelh dan leh mipui ṭawiawmnaah ka lawm hle a ni. Semifinal hi chu kan elpuite result azirin luh theih dan a awm a, kan hmabak match hnihah point ruk hmuh kan tum," tiin chak zel an tum thu a sawi.

MPL kaithar hian Dinthar FC leh Chanmari West an hmachhawn dawn a, semifinal thleng turin vawi hnih an chak a ngaih bakah West Warrior-in point khat bak an hmuh belh a thiang tawh lo bawk.

BVT coach Lalbiaksanga Col-ney chuan, "Chhinga Veng an ṭha a, an chak hi ka lawmpui. Goal kan chhuah hma kha kan tuar a, kan khingpuite an ṭhat leh bawk avangin thawh leh a har a ni. Pa-thian-in kan chapo a hlau a ni ang, Aizawl FC kan khelh hunah chuan ṭha zawka kan rawn kir ngei ka beisei," tiin Vanglaini palai a hrilh.

Tute nge inlan?

Chhinga Veng FC (4-3-1-2) : R. Lalhmangaihzuala; R. Laldinliana, Emma Chigozie, Lalramfelpuia; Paul Ramfangzauva (Joseph Biakthianghlima 84'), Joy Mrong Khar Raswai, VL Thanga; MS Dawngliana (Lalkhawpuimawia 90+2'); Vanlallawma, Joseph Lalnunpuia (Lalramliana Varte 72')

Bethlehem VT (4-4-1-1) : Malsawmdawngzela; Lalhruaitluanga (Hmingthanmawia 31'), Laldinpuia, H. Lalhlimpuia, K. Lalmalsawma; Laldinliana Varte, Lalrintluanga (Samson Lalrintluanga 51'), Lalmawizuala (Zosangkima 81'), PC Zosangliana; Lalrammuanpuia; Lalnunmawia.

ZoFooty Statistics

Chhinga Veng FC 2 - 0 Bethlehem VT

CVFC : Joy Mrong Khar Raswai 2'; MS Dawngliana 70'

MoM : MS Dawngliana CVFC

50% Ball Possession 50%

11 Shots 10

5 On Target 4

1 Yellow Cards 2

0 Red Cards 0

Powered By Rainbow Multibrand

Mobile Showroom