Djokovic-a'n semifinal a lut

World number 2 Novak Djokovic chuan Thawhlehni zan khan Milos Raonic hnehin ATP World Tour Finals khelh mekah semi final lut hmasa ber a ni.

O2 Arena, London-a inkhelah vawi nga champion tawh Djokovic-a'n awlsam takin hnehna a chang mai bik lo, darkar hnih leh minute 14 chhungin 7-6 (8-6), 7-6 (7-5) in hnehna a chang hram. Serbian thiampuipa hian a match hmasa zawkah Dominic Thiem a lo hneh tawh bawk.

Ivan Lendl Group inkhel dangah Thiem chuan French tlangval Gael Monfils lakah 6-3, 1-6, 6-4 in hnehna a chang ve a, a match hmasa zawkah chak lo mah se semifinal luh beiseina a la nei. A match thumnaah Raonic nen an inhmachhawn dawn a, a chak zawk chu a sang pali zingah a inhlangkai ang.

Kum 29-a upa Djokovic chuan, "Ka duhthusamin service rih lo mah ila ka inkhel pumpui thlir chuan a ṭha thawkhat hle. Player ṭha lakah hnehna ka chang a, inrintawkna min pek belh a ni," tiin a sawi.

Grand Slam vawi 12 cham-pion tawh Djokovic hian ATP World Tour Finals bikah hian a match hnuhnung 22-ah ṭum 21 zet hnehna a chang a, tun hnaiah a zawna vawi li champion tawhin tun ṭum hi semi final vawi sarih a luhna chiah a ni.