Ramhlun N harsatna belhchhah theitu Chanmari

17th November, 2016

Mizoram Premier League Season 5-ah kai thar Ramhlun North division hniam zawka tla thei dinhmunah an ding a, Lalruatliana Sailo hote hian zanin dar 7:00 hian Chanmari FC an hmachhawn dawn.Lalsangzuala Hmar hoten hian Ramhlun North dinhmun tih ṭhat aiin anmahni dinhmun siamṭhat hmasak an ngai pawimawh ang.

Dodoz vs Francis

Chanmari FC forward Leonce Dodoz-a'n MPL-ah a thiamna a pholang a, match hnuhnung bera Chanmari West an hneh ṭumin Mal-sawmfela goal khung tur ṭum hnih a siam sak a, man of the match-a thlan a ni.

Dodoz hi match hnu-hnung berah mual sir lam-ah a awm a, ball a thiam avangin Ram-hlun North full back tan ven fimkhur a ṭul dawn a, Ivorian forward hi attacking midfielder ang pawhin a chhawr tlak hle nia sawi a ni bawk.

Chanmari foreigner a lan ṭhat chhan pakhat chu a
ṭhiante ṭhat vang a ni a, goal khung tur Sawmfela an neih miau avangin Ramhlun North tan Ivorian forward ri-ngawt ven bik theih a ni lo ang.

Ramhlun North striker Onyeama Francis-a'n goal hnih a khung tawh a, thlawptu a neih ṭhat tawk loh avangin a theihna tak tak a lang lo niin a lang. MPL kaithar tan an Nigerian forward che ṭha turin midfielder ball thiam Zosangliana (Chhaia) a dam ṭhat a pawimawh a, Armed Veng South tlangval hi a la inlan thei lo a nih pawhin player thar AIFF Academy chhuak Lalramzauva Khiangte-in a thiamna a phochhuah a ṭul ang.

Tlarhnung buai

Chanmari FC-in tlarhnung chak zawk neih duhin Kolkata club Peerless SC aṭangin Ugochukwu Godswill an lalut a, Nigerian defender awm hnuah Sanga enkawl team tlarhnung a phui zo chuang lo. Ramhlun North an hmachhawn hunah hrem vangin defender pawimawh Lalrosanga a la khelh theih dawn loh avangin Chanmari tlarhnung hi a la buai reng.

Ramhlun North-in defen-der pawimawh C. Ramdin-mawia an la chhawr thei dawn lo a, coach Tawia'n Zo United aia goal nawr na zawk Chanmari FC a hmachhawn hunah ruahmanna ṭha zawk a siam a ṭul ang.

Mipui lam

Ramhlun North-in entu an neih tlem ber ṭum pawhin a ruhkawl chin thawm nei tham an nei ziah a, champion rinkai Chanmari FC lamin hlawhtlinna chang turin mipui ṭanpuina an mamawh tih phat rual a ni lo.