Spain hmaah England an zuih

Gareth Southgate-a'n manager lailawk nichunga England team a enkawl hnuhnung berah hnehna a chang zo lo a, Thawhlehni zan khan Spain nen friendly match-ah 2-2 in an inhnehtawk.

Minute 9-na lekah Spain keeper Pepe Reina-a'n Jamie Vardy a tih tluk vanga an penalty hlawhchhuah chu England tan Adam Lallana-a'n hmahruaina goal ni turin a khung a, Vardy hian minute 48-naah Jordan Henderson ball cross chu ṭha zetin a tauh lut bawk - Leicester City striker hian ram leh club tan match 15 hnuah goal a khung ve leh ta.

Wembley Stadium-a goal hnih an khung hnuah England-in an goal neihsa an venghim zo lo a, Liverpool striker hlui Iago Aspas-a'n minute 89-naa goal khat a khung hnuah Isco chuan injury time-ah an si phurh hi a sut zo a ni.

Lallana-a inhliam

Liverpool midfielder Lallana-a'n khelmualah minute 25 bak hun a hmang hman lo a, hliam vangin lakchhuah a ni. Kum 28-a upa midfielder hian season duhawm tak hmang mekin England tan a match hnuhnung pathumah goal a khung vek a, Liverpool tan tun season-a an match khelh zawng zawngah a la inlan vek bawk.

England manager lailawk Gareth Southgate chuan, "Lal-lana thawhpui hi a nuam em em a, hliam vanga lakchhuah vat a ngai khan minti hnual hle a ni. Player fing leh thiam tak a ni a, kan khelh duh danah player
ṭangkai tak a ni bawk," tiin a sawi a, a hliam rei zawng tur a hriat theih loh thu a sawi bawk.

Liverpool hian Inrinni zan dar 8:30-ah Southampton an lenchilh dawn a, Lallana hian a club hlui hi a hmachhawn thei lo a nih chuan Reds tan channa nasa tak a ni ang.

Southgate-a inringtawk

Kum 46-a upa Southgate-a'n match li chhung England a kaihruai a, match hnihah hnehna chanpuiin vawi hnih an khingpui an inhnehtawkpui a, Middlesbrough boss hlui chuan England manager nghet ni tura hna a thawh ṭhat tawk thu a sawi.

England defender hlui chuan, "Boruak sang tak hnuaiah match kan khel a, khatiang ang match boruak sangah kha chuan eng nge thleng dawn hriat lawk a har ṭhin hle. Mahse, chutichung chuan ṭha takin ka hna ka thawkah ka ngai a, match lianthamah pawh ka rintlak tih ka pholang a ni. Ka thlen chinah ka lawm a, hmachhawp min dah sakte chu kan hlen a ni," tiin England manager ni turin a inringtawk hle.