World Cup qualifier Argentina tan goal nen Messi a inlar

Nimin zing South America World Cup qualifier inkhelah Argentina tan Lionel Messi-a'n freekick a pet goal a, an mikhual Colombia lakah 3-0 a hnehna changin table-ah pangana an ni.

Tite kaihhruai Brazil an kaltluang zel a, khualmualah Peru 2-0 a hnehin an hmaruaina an sawh nghet zel. Inkhel dangah Chile tan Alexis Sanchez chu goal hnih nen a lo kir a, 2018 World Cup khel turin beiseina an neih chhunzawm zel.

Messi chu Messi

Brazil laka an mualpho hnuah Argentina coach Edgardo Bauza chuan an insiamṭhat tur thu leh Russia pan loh hlauhthawnna a neih loh thu a sawi a, a thusawi chhanna chu captain Messi a ni.

Argentina tana goal khung hnem ber Messi hian ṭan aṭanga minute 10-na lekah free kick
aṭangin goal hmahruai a khung. Barcelona star hian Lucas Pratto leh Angel di Maria te goal khung tur a siamsak bawk. Kum 29-a upa Messi hian ram tan match 116 a khelh aṭangin goal 57 a khung tawh.

Argentina coach Ed-gar-do Bauza chuan, "Mi tam takin result kan neih ṭhat tawk loh vangin min sawi sel tih ka hria. Ka naute thawhrim zia ka hmuh hian kei chuan demna ka nei ngai lo, goal kan khung avangin a lawmawm - chu-tih-rualin minute 90 chhung Colombia kan dan chah theih avangin ka lawm hle a ni," tiin a sawi.

Brazil chak zel

World champion vawi nga ni tawh Brazil-in football thiam ram an nih zia an tarlang chhunzawm zel a, Gabriel Jesus leh Renato Augusto te goal hmangin Peru 2-0 in an hneh a, match 12 khelh aṭanga point 27 hmuin anmahni hnaih bertu Uruguay lakah point liin hma an hruai.

Kum 1970 World Cup quali-fier-ah khan Brzil hian a zawnin match ruk chhung hnehna an lo chang tawh a, a zawna hnehna an chan rei ber record hi an tluk leh ta chiah.

Brazil tana a match 100-na kheltu Dani Alves chuan, "Mellung pawimawh ka phun thei hi ka lawm a, kan ramah player ṭha leh langsar an tam avangin inkhelh phak a harsa hle. Hetiang kara match 100 zet ka khel thei hi ka lawm hle," a ti. Kum 33-a upa Alves hi Brazil tana match 100 khel tling thei player 13-na chiah a ni.

Chile tan Sanchez

Chile tan Arsenal forward San-chez-a'n hliam vangin Colombia a hmachhawn theih loh hnuah Uruguay khel turin a lo kir a, a zawna Copa America champion ni thei hi hnehna a chanpui nghal.

A zawna match li chhung tlawm tawh lo Uruguay tan striker Edinson Cavani chuan minute 17-naah goal hmahruai khungin an ram beisena a siamsak. Mahse, Chile hian Sanchez-a goal hnih leh Eduardo Vargas goal khat hmangin an chhang let a, point thum an hlawh chhuak.

Chile manager Juan Anto-nio Pizzi chuan, "Alexis hi khawvela player ṭha berte zinga mi a ni a, tun ṭumah pawh khan inkhel boruak ti danglam vektu a ni. Ani kan nei hi kan vannei a, point thum min hmuh pui thei khawpa ṭha a ni," tiin a sawi.