Khelh tam inring lo Iwobi

Arsenal forward Alex Iwobi chuan tun season-ah a beisei aia khelhna hmun a chan tam thu leh season ṭan dawn kha chuan loan hmanga an chhuahtir a rin hial thu a sawi chhuak.

Kum 20-a upa Iwobi hi season kal mekah Gunners player pawimawh a ni. Premier League match 11 aṭangin vawi riat zet inkhel bul a ṭan a, ṭum khat chu bench aṭangin a tlan lut bawk. Heng bakah hian Champions League match li an khelh tawhah a inan kim vek bawk.

Nigerian forward Iwobi chuan, "Tuna ka dinhmun ang hi May thla kha chuan ka beisei phak lo. Nipui transfer lai kha chuan loan hmanga ka chhuah mai ka ring hman hial. Mahse ka thawhrim leh tihtakzetna vangin Arsenal-ah hmun pawimawh ka chang chho ve a, ka lawm hle," a ti.

Nigeria international Iwobi chuan sawi chhunzawmin, "Arsenal tana inkhel bulṭantu zinga tel harsat zia ka hre chiang a, ka dinhmun humhim tur chuan khelmual chhungah manager mit tlung taka ka khelh chhunzawm a
ṭul," tiin Arsene Wenger-a hnuiah hmun nghet chan chhunzawm a tum ruh hle.

Premier League palina Arsenal hian tunkar Inrinni zan hian an league match 12-na khel turin Manchester United khelmual Old Trafford an pan ang.