Indian Football Season tharah I League a hmuhnawm dawn em?

Indian Super League khelh mek a ni a, chutihrual chuan season thara khelh tur I League-in thawm a nei ve reng bawk. Season hmasaah I League aṭangin Aizawl FC relegate mah se tun hnaia AIFF thutlukna avangin I League an khel leh dawn a, Mizo club hi Mizoram Premier League khela an buai laiin I League club dang erawh player thlithlaiin an buai hle thung.

DSk an ṭha dawn!

Season hmasaah DSK Shiva-jians-in table mawng bera awm chungin I League an khar a, season tharah tih mai mai an tum lo. Pune club hian Liverpool International Football Academy – DSK Shivajians coach Dave Rogers chu coach atan an ruat a, Irish club ṭha Shelbourne tan a khelh laia league nomawi pathum chawi thei defender hi Champions League playoff-a Croatian club Hajduk Split lama a goal ropui vanga hriat hlawh a ni a, a enkawlna hnuaiah player-te an phur sawt ang.

Liverpool khaw chhuak coach hian season thar atan Indian player langsar zingah goalkeeper Subrata Paul, rawlthar beiseiawm Halicharan Narzary leh defender Nirmal Chettri te a lalut der tawh a, Serbian defender Sasa Kolunija, Irish midfielder Shane McFaul leh North Korea striker Kim Song Yong-te an neih belh leh tawh bawk.

North Korea international Kim Song-yong hi season hmasaa Bengaluru striker kha a ni a, Royal Wahingdoh-a a khelh tawh bawk avangin Indian football-ah a mikhual lo. Kum 29-a upa Sasa Kolunija hi feet 6 leh inch 4-a sang niin Serbian club hrang hrang tan a khel tawh a, midfielder Shane McFaul hi Irish club ṭha Sporting Fingal tan a khelh laia club Player of the Year ni thei a ni a, a chhe lo ang.

DSK foreigner zingah Juan Quero hi en chakawm ber tur chu a ni. Spanish playmaker hi Real Madrid Academy chhuak a ni a, a hun tam zawk hi Spanish second division lamah a hmang thung.

Champion lai Bengaluru

Bengaluru FC-in AFC Cup final an khel thei a, I League champion hian player lak belh lo pawh ni se an ṭha tawk! Club din tirh aṭanga coach Ashley Westwood-a'n Bangalore club hi chhuahsan mah se Barcelona leh Galatasary assistant coach hlui Albert Roca hnuaiah team
ṭha an nihzia hmuh turin a awm leh der tawh a, coach inthlak kual avangin 'The Steelmen' hi an buai dawn lo tih a chiang.

Bangalore club-in player langsar an neih zingah midfielder ṭha Eugeneson Lyngdoh, India captain Sunil Chhetri ten contract an la hman zawh loh avangin an cham dawn chiang a, Mizo keeper Lalthuammawia Ralte chuan I League champion tan hian a khelh chhunzawm tur thu Vanglaini palai hnenah a lo sawi tawh bawk.

AFC Cup finalist hian Spanish midfielder Alvaro Rubio chhuah mah se Real Valladolid captain hlui an chhuah chhan hi Mohun Bagan winger Sony Norde lakluh an duh vang nia sawi a ni - Haiti international hi ṭhatpui tham a nihzia Kolkata club-ah kan hmu tawh.

Bengaluru hian tlarhnungah Curtis Osano nei tawh lo mah se John Johnson kawppui turin Juanan an nei tawh a, Real Madrid B team defender hlui hi AFC Cup-ah a rintlak zia hmuh turin a awm tawh. Porto youth system chhuak Cameron Watson pawh hi sawi hmaih a thiang lo. Kum 29-a upa Australian midfielder hi A League club ṭha Newcastle Jets aṭanga an lakluh niin Melbourne Knights leh Adelaide United tana khel thei kha a ni a, en liam chi a ni lo.

Tute nge inlan dawn?

I League-a khelh hi dil theih a ni a, lei theih a ni tel bawk! AIFF kalphung mumal lo leh mak tak hian sawisel pawh a hlawh hle.

AIFF-in kum 2018 aṭangin I League chu League One-ah tihhniam a, ISL chu league sang bera siam a tum a, I League club engemaw zat chu he thutlukna avang hian an lungawi lo. Goan club ṭha Salgaocar F.C chu an inhnukdawk der tawh a, Sporting Goa, Dempo SC leh Mumbai FC dinhmun a la chiang lo bawk.

I League club awm mek zingah Bengaluru FC, Mohun Bagan, East Bengal, Shillong La-jong, Aizawl FC leh DSK chu season thara inlan tur chiang sa an ni a, AIFF-in I League khel tur zawnna advertisement a chhuah hnuah pawisa hmanga I League khelh tum club engemawzat an awm leh der tawh!

Tun dinhmunah Punjab club
ṭha Minerva FC leh FC Bardez-in dilna an thehlut tawh a, Minerva hi India international hlui Clifford Miranda, East Bengal striker hlui Manandeep Singh leh Guam international Marcus Lopez kawltu an ni a, an coach Sugao Kambe lah Philippines leh Thai League club Nakhon Ratchasima coach hlui a ni a, I League khel turin pawm lo ni ta pawh ni se an chhe lo ang.

I League khelh tum zingah hian Ozone FC leh Chennai City FC an awm bawk a, Ozone hi season hmasaa Mohun Bagan striker
ṭha Cornell Glen kawltu niin club neitu Ozone group hi ISL club Chennaiyin meuh pawh sponsor thei kha an ni a, I League an khel a nih chuan player ṭha lakluhna sum lamah an buai lo ang.

Chennai City-in I League khelh tumin tih tur ṭulte an ti mek tih an pha lo a, South Indian club hi kum 2014 khan India chanchinbu lar The Hindu neitu Ramesh Rangarajan fapa Rohit Ramesh-a'n a lei tawh avangin player ṭha leina tur sumah an buai a rinawm loh.