Saina Nehwal chak lo nghal

World number 1 hlui Saina Nehwal chuan Ni-laini khan China Open Super Series Premier-ah a match hmasa ber khelin Porntip Buranaprasertuk lakah a chak lo nghal, hetih lai hian PV Sindhu erawh-in hnehna a chang thung.

First round inkhelah Saina hi seeded pawh chang phak lo Thai shuttler Buranaprasertuk lakah hian darkar khat chhungin 16-21, 21-19 14-21 in a chak lo. London Olympics bronze-medallist Saina hian kum 2014 khan China Open nomawi hi a lo chawi tawh a, nikum khan final a lut bawk.

Kum 26-a upa Saina chuan, "Mi tam takin ka tan chuan hun ṭha a liam tawhah an ngai a, kei ngei pawhin ṭha takin ka inkhel leh thei dawn lo ni hian ka hre ṭhin. Chutih rual chuan ka kum a la tam lo a, hliam vangin buai chang nei mah ila ka la beidawng lo," a ti. Indian shuttler hi karleha khelh tur Hong Kong Super Series-ah a inlan zui leh ang.

Inkhel dangah Rio Olympic silver medallist Sindhu chuan Chinese Taipei shuttler Lee Chia Hsin chu minute 34 chhung lekin 21-12, 21-16 in a hneh. World Championship-a broze medal vawi hnih dawng tawh Sindhu hian Beiwen Zhang a hmachhawn leh dawn.

Mipa singles lamah Ajay Jayaram chuan darkar khat zet a inbeih hnuah Zhu Siyuan chu 21-19, 20-22, 21-17 in a hneh a, inkhel dangah world number 28 H.S. Prannoy chuan Long Angus chu 21-13, 21-13 in a lo hneh ve bawk.