Tu pawh kan hneh thei - Ozil

Inrinni zan hian Arsenal chu Manchester United khelmualah an lenglut dawn a, ball an pet hma aṭangin player ṭhenkhat an ṭawng chhuak leh tawh. Gunners midfielder Mesut Ozil chuan eng team pawh hneh thei tura an ṭhat tawk thu a sawi.

Arsene Wenger-a naute hi Premier League-ah palina ni mekin Jose Mourinho naute aiin point ngain an sang zawk mek a, season kal mekah an khelṭha tluang zawk. Chutihrualin Old Trafford hi Arsenal tan hmun ralṭi a nih avangin chak zawk tur swi lawk theih a ni lo.

Arsenal hian Premier League match bikah Old Trafford-ah hian kum 10 chuang zet chu chakni hmel an hmu tawh lo. Hnehna an chan hnuhnun ber chu kum 2006 September thla kha niin Emmanuel Adebayor-a goal khat hmangin 1-0 in hnehna an chang - hemi hnuah an hmelma khel-mualah hian point thum an la hlawh chhuak leh lo.

Kum 28-a upa Ozil chuan, "Eng team pawh hneh thei turin kan squad hi a ṭha tawk a, chu chu tun season chhung hian lantir zel pawh kan tum. Match tinah hnehna chan zel a pawimawh a, a nih loh chuan nomawi chawitu a nih theih loh. A bik takin kan elpui club lian lakah hnehna chan a pawimawh. Chelsea laka kan khelh ang khan United lakah pawh kan khelh chhuah leh ka beisei," tiin Chelsea 3-0 a an sawp ṭum anga khelh chhuah leh theih a beisei thu a sawi.