Southgate dinhmun a ṭha

Football Association chief execu-tive Martin Glenn chuan match li chhung England kaihruai lailawktu England Under 21 manager Gareth Southgate chu England enkawl chhunzawm tura dinhmun ṭha taka a awm thu a sawi.

Kum 46-a upa Southgate hian Eng-land hi match li a kaihhruai chhungin vawi hnih hnehna a chanpui a, vawi hnih an khingpui inhnehtawkpui thung-in Thawhlehni zan khan an match hnuhnung berah Spain chu 2-2 in an inhnehtawkpui.

FA chief executive Glenn chuan, "Dik taka sawi chuan Southgate dinhmun hi a ṭha tawh hle. Mahse, uluk taka engkim zirchian a, thutlukna siam a pawimawh a ni," tiin fimkhur taka England manager tur ruat hna chu an thawh thu a sawi.

Southgate hian coaching lamah tawnhriat nei tam lo mah se Spain nen an inhnehtawk hnuah boruak sang tak hnuaiah pawh team kaihruai turin a ṭhat tawk thu a sawi. England defender hlui hian senior level-ah Middlesbrough chiah la kaihruaiin kum thum a cham a, kum 2009 khan a enkawlna hnuaiah an relegate.

Glenn chuan, "Southgate hi match hnih khat aṭangin kan chhut mai lo a, tun hnai kum chhunga a hnathawh tawh kha kan thlir ber zawk chu a ni. Tun hnaiah mahni inrintawkna a neih belh nasa em em a, kum hnih liam taa Southgate leh vawiina kan hmuh hi chu a dang leh daih tawh a ni," tiin a fak hle.

England manager thar tur hi Glenn bakah FA chairman Greg Clarke leh technical director Dan Ashworth-ten an ruat dawn a, League Managers' Asso-ciation chairman Howard Wilkinson leh England defender hlui Graeme Le Saux te chu thurawn lak nan hman an ni ang.