A hunah tak BVT an rah e!

18th November, 2016

Flying Cristabel Mizoram Premier League Under 18-ah Chhing Vengin league round-ah hneh loh tawng lo mah se nimin tlai semifinal-ah Bethlehem Vengthlang FC an inlehthaltir avangin an tla.

BVT-in semifinal hmuhnawm takah phuba an la a, league round-a 1-3 zeta an ngam loh Chhinga Veng chu 3-1 thoin an hneh let a, an club history-a a vawi khat nan MPL kum naupang zawk inelnaah final an lut.

BVT nge nge

Chhinga Veng tan captain F. Lalnuntluanga'n first half-ah a penalty hmuh chu goal-ah chan-tir thei lo mah se second half
ṭan aṭanga minute hnih lekah goal hmahruai a khung tho. MPL kaithar tlarhma chetfuh loh niah tlarhnung an talbuai a, Bethlehem Vengthlang FC-in goal thum zetin an chhang let.

Minute 53-naah ding lam
aṭanga Lalruattluanga freekick chu PC Laltlanhlua'n a tauh goal a; minute khat hnuah Chhinga Veng keeper Lalfaktlinga'n ball vawrh luh satliah chu chhut sualin BVT forward Lalvenkima'n awl-sam takin hmahruaina goal a khung.

Chhinga Veng hi si an phurh hnuah an talbuai a, si phurh sut thei turin an goal bawh a na lo. BVT goal khung khawl Joel Lalmuanpuia a inlar a, minute 63-ah Chhinga Veng defender Lalhmangaihsanga tauh sual chu um lutin 'cool' takin goal kilah tak a khung.

BVT-in goal thum an khung vangin an inthlahdah lo a, hun tawp thlengin 3-1 in hma an hruai a, inkhel thunun chungin final an lut.

Eng nge an sawi?

Bethlehem Vengthlang coach Benjamin Lalhriatpuia chuan, "Penalty an hlah kha kan vanneih pui a, goal-ah chantir se chuan kan tan thawh chhuah a har tawh ang. Second half-ah erawh chak duh zawk kan ni a, ka naute an khel ṭhat avangin chak kan phuin ka hria," tiin an khelh dana a lungawi thu a sawi.

Chhinga Veng coach Rin-dika Hmar chuan, "League hma-hruaitu kan nih avangin team dang zawngin hneh min châk a, chu chu kan vanduaina a ni. Kan goalkeeper hi a ṭhat avangin senior team-ah hial sawn chhoh a ni a, semifinal-ah erawh a chefuh lo a ni. Vanduai dawn chuan engkim hi kan duh loh ang zawng vekin a kal a, penalty kha khung ila result a dang ang. Tun season hi Chhinga Veng hun a ni lo a, kan senior team thlengin kan vanduai a ni. Season tharah kan khel leh a nih chuan semifinal-ah chuan kan tla tawh lo ang," tiin an vanduai vanga chak loah a inngaih thu a sawi.

ZoFooty Statistics

Chhinga Veng 1 - 3 Bethlehem Vengthlang

CVFC : F. Lalnuntluanga 47'

BVT : PC Laltlanhlua 53'; Lalvenkima 54'; Joel Lalmuanpuia 63'

15 Shots 8

6 On Target 5

3 Yellow Card(s) 1

0 Red Card(s) 0