Premier League Ticket man a tlawm
BBC-in a zirchianna aṭanga a lan danin Premier League ticket man chu tun season-ah nasa takin a tla hniam - ticket man tlakhniam chhan hi Premier League-in pound tluklehdingawn riat man hu TV rights aṭanga sum a hmuh vang a ni a, Premier League club-ten an sum bawm hnawhkhahna tur dang an neih ṭhat avangin ticket lamah fan-te phurrit siamsak an duh lo.
United Kingdom huam chhunga league hrang hrang ticket zirchianna aṭanga a lan danin kum 2016-17 season chhungin club hmun thuma
ṭhena hmun hnihin an inkhel en man ticket tisang loin a ngai an ring. Tun dinhmunah chuan England-a club football inelna sang ber Premier League inkhel en man aiin a hnuai chiaha inelna Championship match khualmuala en man a to zawk - hei hi club lianten mikhual club fan-te ticket £30 aia sanga an tih duh loh vang a ni.
Football Supporters' Fede-ra-tion chairman Malcolm Clarke chuan, "Premier League club ten TV deal aṭanga sum an hmuh pound tluklehdingawn 8.3 aṭanga chhut chuan top flight club te hian ticket hi man nei miah loin hralh chhuak pawh nise season hmasaa an sum hmuh zat kha chu an la hmu thei dawn tho tho a ni," tiin ticket man tlawm chhanah TV deal chuan thui taka nghawng a neih thu a sawi.
Premier League pawhin thuchhuah siamin, "Club chuan fan-te a ngaihtuah reng a, he inelna hi a hmuhnawm leh mipui ngaihven a hlawh ang chiahin fan-te ban phakah hian awm reng se kan duh a ni," tiin ticket man an tih hniam chhan an puang.
Khaikhinna
English football bik thlirin a division san leh player inthlauh dan ngaihtuahin ticket man a inthlau lo hlawm hle. Club hrang hrang ticket man bituk dan lakkhawm aṭanga a lan danin Championship club ten away ticket an ti to ber a, chawhrualin club tinin mikhual team fan-te tan £31.57 a ticket hralh zel ang an ni.
Championship hnuai chiahah Premier League club te an awm a, chawhrualin away ticket hi £29.44-a hralh ṭhin ang an ni. English third division League One-in Premier League a hlat lutuk lo a, chawhrualin League One club te hian £23.37-a away ticket hralh ṭhin ang an ni. League Two club ten an chung chiah division League One club te away ticket man tih to lamah an thlau lutuk lo a, chawhrualin £21.80-a hralh ṭhin ang an ni.
Ticket man
Home match ticket man tlawm ber chu chawhrualin season hmasa nena khaikhinin 6% in a tlahniam a, a man tlakhniamna hi £30.95 aṭangin £29.05-ah a ni. Season hmasa nena khaikhinin away ticket man bik tlakhniamna hi 37% a ni a, chawhrualin season hmasaa £46.44 man ticket kha £29.44-ah a tlahniam tihna a ni.
Premier League ticket hrang hrangah 14% chiah a man a pung a, 34% chu season hmasa ai khan a hniam zawk a, 53% chin chu a ngai ngaiin kalpui a ni. Premier League club zingah Burnley, Middlesbrough leh Leicester ten an ticket man tlawm ber ṭhin chu an tisang a, Hull City, Liverpool leh Man-chester City ten ti tlawm thungin club dang zawng hian a man an tisang thung.
Arsenal chu Premier League club zinga ticket man nei to ber an ni a, an ticket man sang ber hi £97 a ni. Mahse, kum 2014-a an hman ṭan hnuah erawh an la tisang leh lo thung. Hull City leh Liverpool chu ticket nei tlawm ber an ni a, an ticket neih zinga man tlawm ber hi £9 niin hetiang zata ticket man tlawm hi club dangin an la nei ve lo.
Season ticket ang tawp chuan London club lamin an ti to a, a sang ber Arsenal chuan £2,013-in an zuar a, Tottenham Hotspur-in £1,895-a zuarin Chelsea season ticket chu £1,250 a ni thung. Hull City chu season ticket man tlawm ber an ni a, an season ticket hi £252 in an zuar.
A behbawm
Premier League club ten ticket man an tih tlawm laiin 31% lai chuan naupang hak jersey man an tisang a, Manchester United chu naupang jersey zuar to ber niin £50-in an zuar. Puitling jersey zuar to ber pawh Manchester United tho niin an ṭhenawm Manchester City nen puitling jersey an zawrh chhuahna zat hi £60 a ni. Premier League club zingah Bournemouth leh Burnley chu puitling jersey zuar tlawm ber an ni a, £40 in an zuar.
Tun hnai kum ruk chhungin United Kingdom-ah pies (chhang) man 17% in a pung hman a, thingpui man chu 13% in a pung bawk. Hei hian Premier League lamah pawh nghawng a nei a, stadium chhunga heng ei tur zuartu Premier League club te chuan nasa taka an tih to a ngaih phah. Liverpool leh Manchester United chu thingpui zuar to ber an ni a, £2.50-in thingpui no khat an zuar - Manchester United hian an thingpui zawrh chhuah aṭanga Paul Pogba man pound maktaduai 89 hmuchhuak tur chuan thingpui no maktaduai 35.6 an hralhchhuah a ngai ang.
Note: British pound 1 leh India pawisa cheng 84.53 a intluk