Vawiinah volleyball final

Samsung 3:16 MVA Invitation Tournament chu vawiin hian TNT volleyball court, Muanna Vengah final khelh tur a ni a, Hunthar VC leh Chhinga Veng VC an inhmachhawn ang. Hmeichhe lamah Power Deptt. SC leh Electric VC te an inkhel thung ang.

Mizoram Volleyball Association buatsaih he inelnaah hian mipa team pasarih leh hmeichhe team pali an tel. Mipa champion hian Rs 80,000 an dawng ang a, hmeichhe champion-in Rs 30000 an dawng thung dawn.

Mipa final khel turte hi tun tournament chhunga team ṭha ber pahnih an ni. Hunthar hian semifinal-ah inelna thlengtu TNT chu 25-22, 25-19, 25-16 (3-0) in an hneh. Hnehna an chan theih nana player pawimawh setter S. Karthik chu man of the match a ni.

Semi final lehlamah Chhinga Veng hian 3rd MAP lakah 25-16, 25-18, 30-28 (3-0) bawkin hnehna an chang ve bawk. Chhinga Veng hian final kalkawngah set khat mah an hlauh lo a, MAP an hneh ṭum hian blocker Ashwal Rai chu man of the match atan thlan a ni.

Hunthar VC hian tualchhung player ṭha Remsangzuala, Biak-muana, Samson-a, Sawmsanga te an neih sa bakah team ti chak turin Tamil state player S. Karthik leh Selva Prahbu an neih belh bawk. Chhinga Veng pawhin khawtual player duhkhawp loin state pawn player Ashwal Rai, Varun leh Shravan te an chah lut, Ashwal Rai leh Varun te hi man of the match atan thlan an ni tawh.

Hmeichhe inelna lamah Power Dept. chuan final lut turin Bethlehem Vengthlang 25-15, 25-14, 26-24 (3-0) in an hneh a, a tir aṭanga an player pawimawh chu Vardingliani niin champion an duh a nih chuan ani bawk hi a chet ṭhat leh a ṭul ang. Semi final lehlamah Electric VC chuan Dungtlang lakah set hmasa pahnih hloh mah se an insiam ṭha a, 21-25,24-26,25-23,25-15,15-12 (3-2) a hnehna changin final an lut.