Messi cham beiseitu Barca president

Barcelona president Josep Maria Bartomeu chuan an thiampuipa Lionel Messi chu football a chawlhsan thlengin an hnenah a cham a rin thu a sawi. Argentina captain hian Nou Camp-a cham turin kum 2018 thleng contract a la nei mek a, Spanish thuthar theh-darhtu te chuan tun hnaiah contract thar a ziak duh lo niin an sawi.

Bartomeu chuan, "Messi hi hlawhtlinna tam tak min chhar-puitu a ni a, he hmunah hian a huntawp a hman hi mi zawng zawngin an ring vek a ni. Player ropui tak tak kan kawl a, zep rual lohin Messi hi a hruaitu ber leh khawvel huap pawha hriat hlawh chu a ni a, kan hnenah a career tawp thlengin a khel dawn tih kan hre vek a ni," a ti.

Barcelona hian Japanese online company Rakuten chu contract thar an ziahpui bawk a, an kawr hmaah Rakuten tih ziakin kum tin pound maktaduai 47 an dawng ang. Inremna hi 2017-18 season aṭanga kal
ṭanpui tur a ni dawn a, an sum dawn tur hi an chet ṭhat dan a zirin a pung thei bawk ang.

Spanish club hian La Liga nomawi an chawi chuan an dawn tur pangngai pound maktaduai 53 bakah 1.3 an dawn belh ang a, Champions League nomawi an chawi chuan pound maktaduai 4.3 an dawn belh bawk ang - Barcelona hian La Liga leh Champions League nomawi season khatah an chawi thei a nih chuan season khatah shirt sponsorship aṭangin pound maktaduai 53 ngawt an dawng thei dawn tihna a ni.

Barcelona leh Rakuten inremna ang chuan Japanese company hian advertisement lamah Barca player te an dawr thei ang a, kum li chhung hian kumtin Japan-ah match khat tal an khel bawk ang.