Celtic-in Gerrard sawm lo

Liverpool legend Steven Gerrard chu LA Galaxy a chhuahsan tur thu a chian hnuah Celtic zawm tur anga sawi ni mah se Scottish club manager Brendan Rodgers chuan England captain hlui hi lakluh tumna an neih loh thu a sawi chhuak.

Anfield-a Gerrard lo enkawl tawhtu coach chuan, "Steven hi player ropui tak a ni a, Liverpool-ah khan hun duhawm tak kan hmang dun a ni. January transfer hnaih tawh lamah LA Galaxy a chhuahsan avangin a kalna tur an inrinsiak hi a awm lo hran lo a, Celtic hi a club ngainat tak a nih vang leh ka player hlui engemawzat ka thawhpui avangin sawi zawm a ni pawh hi a awm a, mah se thu lengvakah ka inhambuai ve ngai lo. Keini chuan tuma hriat lohin player kan dawr ṭhin," tiin Gerrard-a'n Celtic zawm tur anga sawi chu thu lengvak mai mai a nih thu a sawi.

Rodgers chuan sawi chhunzawmin, "Steven hian coaching lama kal a duh zawkin a rinawm a, Liverpool-ah khan Kolo Toure nen B Licence an zir dun a, player ropui leh huaisen an nih avangin coaching lamah pawh kal se an tisual lo ang. Steven hian coach ni turin quality a nei tawk a ni," tiin 'Captain Fantastic' tia hminglem an pek chu coach ni tur pawhin a ṭha tawkah a ngai.