Villa-in an defender an chhuahtir
Aston Villa defender Easah Suliman chuan Portuguese club Vitoria Guimaraes a zawm a, a man zat erawh puan zar a ni lo.
Kum 21 mi centre back hi Pakistani thisen kai a ni a, England Under 16, Under 17 leh Under 19-ah te captain armband a lo hreng tawh - Asian thisen kai zinga eng level-ah pawh England captain ni thei hmasa ber a ni.
European Under-19 Championship 2017-a England an champion ṭuma squad-a tel phak Suliman hian Primeira Liga club tan hian kum li leh a chanve cham turin contract a ziak a, kum li liam ta chhung khan Cheltenham Town, Grimsby Town leh Dutch club FC Emmen-ah te loan-in hun a hmang.
Aston Villa academy chhuak Suliman hian Portuguese club-ah hian England U19 tana a lo khelhpui tawh Marcus Edwards a zawm dawn a, a mikhual lutuk lo ang.
Villa tana Carabao Cup-a a senior match awmchhun kheltu Suliman hma hian forward Jonathan Kodjia chuan Qatar club Al-Gharafa a zawm tawh a, reserve goalkeeper Lovre Kalinic chuan French Ligue 1 club Toulouse chu season tawp thleng atan loan-in a zawm bawk.
Hetihrual hian Villa hian striker Mbwana Samatta chu Genk aṭangin pound maktaduai 10-in an lalut a, goalkeeper Pepe Reina chu AC Milan aṭangin loan-in an hawh a, midfielder Danny Drinkwater chu Chelsea aṭangin loan-in an la bawk.