Iran lakah India tlawm

FIFA ranking-a 133-na India tan 20-na Iran hmachhawn chu a la hautak hret a, Varzişgohi Markazii, Hisor-a inkhelah Blue Tigers hi 3-0 ngawtin an tlawm.

India coach Khalid Jamil-a'n Iran lakah tlarhnung ven ṭhat a pawimawh tih hriain, fimkhur takin team a rem a, chawlhlawk thleng pawhin team ṭha zawk Iran hian goal an la khung lo.

Mahse, Blue Tigers an ṭang reng thei bik lo. Minute 60-naah Amirhossein Hosseinzadeh chuan goal hmahruai a khung a, India an tho tawh lo - Khalid-a'n goal khung beiseiin, minute 83-naah Lallianzuala Chhangte a luhtir a, mahse, Mizo tlangval tan a harsa tawh.

Minute 89-naah Ali Alipour chuan a khung belh a, hun pek belh minute ruknaah FC Porto striker hlui Mehdi Taremi chuan a belhchhah bawk.

India leh Iran an inthlau hret a, bench aṭanga Feyenoord winger hlui Alireza Jahanbakhsh leh season hmasaa Inter Milan tana khel Taremi te an luh hnuah Iran an ṭhat belhchhah a, India-in an ngam lo.

Iran-in match hnih hnehna an chan avangin final an luh mai a rinawm a, Blue Tigers-in Ningani tlaiah Afghanistan an hneh chuan third place inchuhna inkhel turin chance an nei ang.