MFA leh MISA ṭangkawpin Inter School Football Tournament buatsaih dawn

Mizoram Football Association leh Mizoram Independent Schools Association (MISA) ṭangkawpin a vawi khatna atan Inter School Football Tournament an buatsaih dawn a, inelna hi September 23, Thawhlehni aṭangin khelh ṭan a ni ang.

MFA buasaih inelnaah hian MISA member school te tan a ni dawn a, mipa leh hmeichhe category siam a ni dawn. Mipa inelna hi middle school, high school leh higher secondary school-ah te ṭhen a ni dawn. Hmeichhe inelna hi middle school leh open category-ah ṭhen a ni dawn a, open category-ah hian high school leh higher secondary school te an tel thei ang.

Hmeichhe category pahnih leh mipa middle school category hi Small Sided Game (9v9) a khelh tur a ni a, field chanveah (half ground) ah khelh a ni dawn. Inkhelh hun chhung hi minute 50 (25-10-25) a ni ang a, minute 10 chawlh a awm ang.

Mipa high school leh higher secondary school hi field puma kheh tur a ni a, inkhelh hun chhung hi minute 70 (35-10-35) a ni dawn. Zirlai endikna atan 'Students-te PEN leh MBSE Registration' hman a ni ang. ‘Special criteria student’ te tan school principal-in organising committee-ah dilna a siam tur a ni.

Special criteria student hi raltlan, zirna ina kal mah se document nei mumal lote an ni. School pakhatin category tinah team pakhat aia tam tel theih a ni lo a, coach pakhatin school pakhat chauh a enkawl thei ang.

Tournament hi league leh knockout inchawhpawlh a ni dawn. Entry Fee hi category khatah Rs 2,000 zel a ni ang a, September 3-16, 2025 inkar hian MFA Office, City Park-ah pek theih a ni ang. MFA hian MPL Under 17 a buatsaih dawn bawk a, school inelna hi player zawnna hun ṭha tak a ni thei ang.