Bayern Munich striker thar Jackson

Chelsea striker Nicolas Jackson chuan season khat chhung atan Bayern Munich chu loan hmangin a zawm a, an inremna hmasa hi a zawh hunah Bavarians hian a nghetin an lei thei dawn bawk a ni.

Jackson hian Blues chhuahsan a duh a, chhuak tur pawhin hma a la. Mahse, Munich a thlen hnuah London club hian chhuah an phal leh lo a, nipui bazar tawp niah erawh Bundesliga club a zawm thei ta hram.

Bayern Munich hian season khat chhung hawh man a tan pound maktaduai 14.3 an pe ang a, a nghet a lalut turin pound maktaduai 56.2 an hman leh a ngai dawn - season nga chhung atan contract ziak turin an inrem a, a man zawng zawng hi pound maktaduai 70.5 a tling thei dawn tihna a ni.

Senegal international hian kum 2023 khan Villarreal aṭangin Chelsea hi a zawm a, pound maktaduai 32 man a ni. Inelna hrang hrangah match 81 a khelh aṭangin goal 30 a khungsak a, tunah chuan chona thar a hmachhawn ang.

Kum 24 mi Jackson chuan, "Bayern Munich hi khawvela club ṭha berte zinga mi a ni a, an chhungkaw zinga ka tel ve thei ta hi ka lawm. Bayern tana lo khel tawhte hi an hming inzawh chawp a ngain lo, chutiang taka hmingthang chu an ni.

"Thil tum mumal tak ka nei a, Bayern Munich tan hian ka theihtawp ka chhuah dawn a ni," a ti. Bayern Munich hian Harry Kane an nei a, ani hi a dam a nih phawt chuan a inkhel ṭhin, hmun chang tur chuan Jackson tan hna a hautak khawp ang.

Kumin April mai khan Chelsea manager Enzo Maresca chuan Jackson hi number 9 duhthusam a nih thu a sawi a, mahse a ngaihdan a thlak - Joao Pedro an nei a, Liam Delap an nei bawk. Delap hi hliam rih mah se Sunderland-a loan hmanga an chhuahtir Marc Guiu a ko let a, Jackson-a'n Bayern a zawm theih phah.

UEFA dan leh hraiah chuan, loan hmanga chhuak player-ten an club nghet an hmachhawn thei. Bayern Munich leh Chelsea te September 17 hian Champions League khel turin an intawng dawn - Jackson hian Blues a hmachhawn nghal thut mai thei.

Vincent Kompany enkawl Bayern Munich hian Bundesliga title humhim an tum dawn a, league nomawi bakah hian European football inelna sanga hlawhtlin tumin hma an la a, nipui bazarah Liverpool aṭangin Luis Diaz an la bawk a ni.