Fenerbahce-ah Ederson, Inter-ah Akanji

Manchester City-in PSG aṭangin £26mtd sengin Gianluigi Donnarumma an lalut a, Fenerbahce-in Ederson chu £12.1mtd-in an lei chhuak thung. Swiss defender Manuel Akanji pawhin season khat chhung loan hmanga khel turin Inter Milan a pan ve bawk.

Kum 32 mi Ederson hian kum 2017 khan £35mtd-in Benfica aṭangin City hi a zawm a, inelna hrang hrangah City tan match 372 khelin Premier League nomawi paruk leh Champions League bakah FA Cup nomawi pahnih a chawi a, 2022-23 season-a an treble champion khan player pawimawh a ni.

Ederson chuan, "Man City-a kan hlawhtlinna chante ka chhuang takzet a, Pep-a hnuaiah Premier League thununin Europe kan awp bawk. Kum riat kal ta khan Manchester hi ka zawm ang, hetiang ang hlawhtlinna hi kan chang ang tih ka ngaihtuah pha lo. Kan tan chuan City hi a hlu a, he club hlu tak fan hi ka ni kum khua tawh ang. Ka nupui fanau te nen kan chhuahsan dawn a, mah se ka chhungkaw lian tak Cityzens ka kalsan a ngai dawn a ni," tiin a sawi.

Brazilian keeper hian Premier League match 276 a khel a, clean sheet vawi 122 neiin assist vawi sarih a nei a, a record hi a chhuanawm hle. Fenerbahce hian August 29, Zirtawpni khan an coach Jose Mourinho an ban a, Zeki Murat Gole-a'n a enkawl lailawk rih a ni.