Mizoramin chakin bul an ṭan

75th National Junior Basketball Championship-ah coach KC Lalliantluanga kaihhruai Mizoram team chuan nimin khan Puducherry chu 67-65 in an hneh. Inelna hi Ludhiana, Punjab-ah neih a ni a, Mizoram hi group C-ah Odisha, Goa, Gujarat leh Puducherry te nen awmin tukin zing dar 9:30 hian Gujarat an hmachhawn ang.

Mizoram tan PC Lallawmawma, Christian Lalhmachhuana Sailo, Emmanuel Lalpekhlua, RL Rinchhana leh Samuel Vanlalpeka ten bul an ṭan a, halftime-ah 36-30 a hma hruai tawhin hun tawpah point hnih chauhin inthlau mah se harsatna lian tam tawk lo.

Mizoram coach KC-a chuan, "Kan zin hun chhung a rei a, August 27 kha kan ball khawih hnuhnun ber a ni a, Ludhiana-ah ruah sur vanga training kan neih theih loh avangin inkhelh a harsa. Chutihrualin kan naute match hmasa berah an khel chhe lo a, hnehna kan chan avangin ka lawm hle," tiin Vanglaini a hrilh.

75th National Junior Basketball Championship- hi SportsCast India YouTube channel-ah en theih a ni.