Gauff vaw chhuaktu Osaka
Naomi Osaka chuan Coco Gauff hnehin US Open 2025 khelh laiah quarterfinal a lut - vawi a hnih a champion tawhna hmunah Osaka a mikhual lo a, fa a neih hnuah a khelh fuh ber ṭum a nih hial a rinawm.
Japanese star Osaka hian Thawhṭanni zan khan seeded pathumna Gauff hi 6-3, 6-2 in a hneh, semifinal lut tur chuan Karolína Muchova a paltlang leh a ngai dawn a, inrintawkna a nei sang tawh khawp ang.
Osaka hian kum 2023 khan fanu Shai a nei, inkhelh chawlhsan mai loin tennis court-ah a lo kir leh a, tun hma lama a boruak ang kha nei leh nghal thei mai lo mah se, player ṭha a nihna chu a lang chhuak leh ṭhin.
Gauff ang thoin Osaka hi tualchhung nula anga chhiar theih a ni a, Arthur Ashe Stadium-ah entu pawh an ṭha hle. Mipui 23,771 hmaah Osaka a chungnung a, tawnhriat a neih ṭhat bakah a taksa a fit ṭha tih a lang bawk.
Grand Slam vawi lo champion tawh Osaka chuan, "Gauff hi kei aia naupang zawk ni mah se a inkhel ka en nasa a, kawng tam takah ka entawn ṭhin. A khelh dan mai bakah a nun a thunun theh dan ti hi a fakawm hle, kum naupang zawk tan phei chuan a lak aṭangin zir tur tam tak a awm.
"Ka hnuk a ulh leh mai ṭhin a, khelmual nuam leh hmingthang tak maiah hnehna ka chang leh thei hi ka lawm, lawm avangin ka mittui tla chiah lo mah se ka rilru chu a khawih hle a ni," tiin a sawi.
US Open 2023 leh French Open champion Gauff chuan, "A chak lo zawk nih hi chuan lungawi a harsa ṭhin, mahse infiamna huangah chuan a chan chhia leh che fuh loh zawk kan nih chang a awm, chutiang hunah chuan kan thawh chhuah leh theih dan tur ngaihtuah a ngai zawk.
"Osaka khan a khel ṭha em em a, set pahnih kan khelh kha a thunun hneh hle," a ti. Gauff hi kum naupang tak ni chunga alr thei a ni a, tunah hian kum 21 mi chauh la ni mah se Grand Slam title pahnih a nei tawh, hmabak êng tak a nei mek.
Inkhel dangah Amanda Anisimova a che fuh zel, a khingpui Beatriz Haddad Maia chu 6-0, 6-3 a sawp chungin last 16 a paltlang ve bawk - a hmabak chu Iga Swiatek a ni dawn a, zanin hian final luh inchuhin an intawng zui leh nghal ang.