Ṭha turin i sa a pan chhe lutuk minti ṭhin - Ronaldo

Real Madrid superstar Cristiano Ronaldo chuan mipui sawiselna chu amah fuihtu ṭha tak a nih thu a sawi chhuak. Manchester United winger hlui hi a naupan laiin khawvel hriat phak footballer ni tur chuan a cher lutuk tiin hrilh ṭhin mah se a beidawn phah lo.

Kum 30-a upa Ronaldo chuan amah intih larna video-ah, "Thawhrim a pawimawh. Tuna ka tih ṭhin ang hi nitin ka tih ṭhin vangin hun rei tak chung khawvel player ṭha ber zinga mi ka ni. Vanneih vang ringawta tuna ka pian ang nei hi ka ni bik lo, field pawnah rim takin ka thawk ṭhin a ni," tiin a sawi.

Ronaldo chuan a tunhma hun sawiin, "Ka naupan lai chuan 'Ronaldo thiam viau mah la lar tur chuan i cher lutuk deuh a ni' tiin min hrilh ṭhin. Chuvangin ka taksa siam turin gym ka pan tam a, nasa takin ka taksaah a langchhuak a ni. Nitina kan exercise lak tam vak loa kan ngaih belhkhawm hian pian dik zawkah min siam a, player ṭha ka nih theih phah a ni," tiin gym a kal nasat thu a sawi.

Ronaldo hi Manchester United tana a khelh lai khan club strength & conditioning coach chuan gym workout-ah a ṭhat lawr lak thu a lo sawi tawh. Season liamta khan Ronaldo hian Real Madrid tan match 54-ah goal 61 a khung.