HWL Semifinal-ah Australia an champion

Pathianni khan KHC Dragons Stadium, Antwerp-ah Men's Hockey World League Semifinal khelh zawh a ni a, world champion Australia-in Chris Ciriello goal hmangin inelna thlengtu Belgium 1-0 a hnehin an champion.

Final khelh hma hian Great Britain lakah India an mualpho a, Asian champion hi 1-5 zetin an chak lo.

Hockey World League Semifinal pakhat zawk hi Buenos Aires, Argentina-ah June 14 khan khelh zawh a ni tawh a, Germany an champion. Semifinal-a pathumna chin ve ve hi nakkuma Rio de Janeiro a neih tur Olympic khelh turin an tling.

Antwerp aṭangin Australia, Belgium leh Great Britain te an tling a, Buenos Aires aṭangin Germany, Argentina leh Netherlands te an tling ve bawk. India erawh palina ni mah se 2014 Asian Games an champion avangin Olympic khel turin an tling tawh a, group leh lama palina Canada erawh Olympic khel pha turin Men's FIH Hockey World League Final-ah an chetṭhat a pawimawh ang.

HWL Final hi November 28 leh December 6 inkar khian Mohali, India-ah khelh a ni ang.

India hmeichhe team erawhin Hockey World League final round an thleng zo lo. Amaherawhchu India pangana hmun inchuhnaah Japan 1-0 in an hneh a, 1980 Olympic hnua a vawi khat nan inelnaa tel theih dan an la nei.

South Korea-in Antwerp-a semifinal neih zawh takah pahnihna an nih vangin Olympic khel turin an tling a, Asian champion an nih vanga an tlin avangin kum 35 hnuah India hmeichhe team-in Olympic khelh theihna hun ṭha tak a nei a ni.