Formula 1 An ramah Hamilton-a'n hnehna a chang
Lewis Hamilton chuan ruahsur tihbuai phak loin Pathianni khan British Grand Prix-ah hnehna a chang. Mercedes driver hnungah hian a team-mate Nico Rosberg thlengin pathumnaah Ferrari driver Sebastian Vettel a thleng ve bawk.
Infiammi an ngaihsanna ram Britain-ah mipuiin ṭan rawn tur an duh. Tennis star Andy Murray-a'n ṭantu a ngah tluk zetin Pathianni khan Silverstone tlankawngah fan 140,000 vel zet chu Hamilton intlansiak en turin an pung khawm. An duh leh beisei ang ngeiin Mercedes driver hian a vawi thum nan an ramah hnehna a chang.
Kuminah driver pathum Hamilton, Rosberg leh Vettel an che ṭha tluang a, intlansiak vawi kua awm tawh aṭangin driver pathumte hi poduim-ah vawi ruk zet an ding rual tawh a ni.
Qualifying a tan ṭha Hamilton-a'n pole position aṭangin intlansiak bul ṭan mah se bul a ṭan fuh lo thung. An tlan ṭan chauh tihah Williams driver pahnih Felipe Massa leh Valtteri Bottas te chuan an tlan pel nghal.
Mahse, team ṭha Mercedes chuan pitstop hmasa ber hmang ṭangkaiin Lewis chuan a hmaa awm Williams driver pahnih a tlan pel lehnghal. Mercedes hian an tyre ṭhat zar an zo pawh a tih theih ang, ruah a sur hma lap 52 tlan tur a lap 36 an tlan lai khan Rosberg chu palina ala ni pha chauh. Mahse, ruah a tlak hnuah team dang car aiin an tlan chak ngam zawk tih a lang chiang hle. Lap kua chauh tlan tur a awm tawh tihin Hamilton hian tyre hman a thlak a, a ti fuh hle a ni.
Hamilton hian anmahni ramah kum 2008 leh 2014 khan hnehna a lo chang tawh bawk a, tun ṭum hi a vawi thum chakna niin tun season itlansiak vawi kua awm tawh aṭangin vawi nga hnehna a chang tawh. Driver championship-ah pawh hma a hruai fal zel a, point 194 hmu mekin amah hnaih bertu Rosberg chuan point 177 a hmu tawh bawk.
Kum 30-a upa British driver chuan, "Ka lawmna hi thuin a sawi fiah chhuak zo lo ang. Min ṭan tura mipui heti zat mai an rawn pungkhawm hi a mak ka ti hial zawk. Ka hnehna chan hi ka fan-te tan liau liau ka hlan e. Anni hi awm lo se chuan hetiang dinhmuah hian ka ding phak lo ang. Mahni ram ngeia hnehna chan aia nuam leh hlimawm hi thil dang a awm thei chuang lo ang," tiin a sawi.
McLaren driver Jenson Button chu lap khatna lekah che sualin intlansiak a chhunzawm thei lo a, a teammate Fernando Alonso erawh 10-naah thlengin point khat a hmu ve. Inhliam vanga tun season intlansiak hmasa ber tlan thei lo Alonso hian tun season-a a point hmuh vawi khatna a ni nghe nghe.
Kum 35-a upa Button bakah hian driver paruk Carlos Sainz, Daniel Riccairdo, Max Verstappen, Romain Grosjean, Pastor Maldonado leh Felipe Nasr te chuan intlansiak an tlan tluan thei lo.