FIFA buaina World Cup thlengtu thlannaah politician an inrawlh - Blatter

FIFA president Sepp Blatter chuan kum 2018 leh 2022 World Cup thlengtu tur thlanna an neih hmain France leh Germany president te an inrawlh thu sawiin, kum 2010-a Russia leh Qatar World Cup thleng tur tihfel a nih hma khan French president hlui ni ta Nicolas Sarkozy leh German president Christian Wulff te'n member ṭhenkhat hnenah vote tur an hrilh thu a sawi.

Kum 79-a upa Blatter chuan, "Politician ho inrawlh avang khan Qatar-ah World Cup kan nei dawn ta a ni. Thutlukna siamtu zinga tel tawh phawt kha chuan mawhphurna kan la ngam vek tur a ni," tiin Swiss Court-in a chhui mek 2018 Russia leh 2022 Qatar World Cup thlen tur chungchangah mawh an phur vek thu a sawi.

June 2-a FIFA president aṭanga a ban tur thu sawitu Blatter chuan sawi chhunzawmin, "Russia leh Qatar-a World Cup nghah a nih hma khan politician pahnih an inlar a, Messrs Sarkozy leh Wulff te khan theihtawp chhuahin hma an lo la a ni," a ti.

Blatter chuan Germany leh Qatar chu insumdawn tawnna lamah an thawhho avangin German sorkar hruaitute chuan German football association (DFB) hnenah World Cup thleng tur thlannaah Qatar vote turin an hrilh niin a sawi bawk.

Swiss pachal hian a duh­tawk mai lo, na taka Germany kah chhunzawmin, "German company te hi en teh u, The Deutsche Bahn (German rail­ways) leh Hochtief (construction) company engemaw zatin World Cup thlengtu tur thlan a nih hma khan Qatar-ah project an kalpui a ni," tiin Germany chu an hamṭhatna tura Qatar vote-ah a puh.

German football association (DFB) president hlui Theo Zwanziger chuan World Cup thleng tura Qatar dinhmun ṭhat tawk leh tawk loh chungchangah Germany preisdent hlui Wulff nen inbiakna an neih ngei thu a sawi a, vote chungchanga inrawlh anga an puhna erawh a pha thung.

Blatter chuan FIFA duhdan anga a kal thu sawiin, "Hruaitu in a tih tur ang tak ka ti a, FIFA executive committee member tam zawkin Qatar an thlan avangin kei chuan rilru dam takin ka pawm mai a ni," a ti.

FIFA president thar thlan a nih hun a chuh leh tur anga an sawi Blatter chuan a chuh tawh loh tur thu a tichiang bawk.