Ka ṭhiante tana ṭangkai turin ka khel ṭhin - Pastore

Argentina midfielder Javier Pastore chuan a mimal lansarhna ai chuan an ram team tan a ṭangkai thei tur ang bera a khel ṭhin thu sawiin a bik takin Angel Di Maria leh Lionel Messi te chawm chu a hna a nih thu a sawi bawk.

Argentina hian Copa America final-ah a thlengtu Chile chu penalty shootout-ah 4-1 a hneh loin an tlawm a, final an thlen theih nan Paris Saint-Germain midfielder Pastore hi player pawimawh leh ṭangkai tak a ni nghe nghe. Semifinal-a Paraguay an hneh ṭumin goal a khung bakah a ṭhiante khung tur a siamsak bawk.

Kum 26-a upa midfielder chuan, "Ball semtu ka nih avangin ka hna ber chu ka ṭhiante tana a tam thei ang ber ball pek kual a ni. A bik takin mi goal khung tur siamsak hi ka hna a ni bawk. He hna hi club leh ram tana ka khelh pawn a dang chuang lo. Argentina tana ka khel a nih chuan Leo leh Di Maria te tana ṭangkai thei ang ber tura ka khelh hi a fuh berin ka hria," a ti.

Sawi chhunzawmin PSG player ṭangkai chuan, "Tun ṭumah hian vanduai mah ila nakinah chuan kan tan hun ṭha chu ala inher chhuak ve ngei ang tih hi ka ring tlat. Final-a vanduai hi a hrehawm em em a, amaherawhchu lungngaia indawm kun reng tur kan ni lo, hmalam thlir zawk tur kan ni ang," tiin a sawi bawk.

Pastore hian an ram Argentina tan match 25 khel tawhin goal hnih a khung ve tawh bawk. Season hmasa tawp lam leh Copa America-ah a chet ṭhat avangin season tharah chuan France champion PSG player pawimawh berte zing ami a ni ngeiin a rinawm.