Davis Cup khel lo tur Tomic

Australia-a tennis thuneitu sang 'Tennis Australia' chuan Bernard Tomic chuan thla leha neih tur Davis Cup-ah an ram ai a awh loh tur thu an sawi.

International Tennis Fede-ration (ITF)-in a buatsaih ṭhin Davis Cup hi kum 1900 aṭanga neih ṭan niin mipa inelna a ni. Kha­wvel ram hrang hrang tennis thiam bik ram 16 te inelna niin champion lai chu Roger Federer-a te ram Switzerland an ni nghe nghe.

Kar hmasa khan Wimbledon third round-ah kum 22-a upa Tomic hi Novak Djokovic hneh loin a tla a, a chak loh vang hian court-ah nungchang mawi lo a lantir bakah a hnuah an ram tennis thuneitute a sawisel zui bawk.

Tennis Australia president Steve Healy chuan, "A nungchang mawilo tak hi ngaihzam mai mai chi a ni lo. Infiammi tan chuan ram aiawh a inlan tluka hlu a awm chuang lo ang, ani erawh hi chu ram tana khel tlak a ni lo," tiin na takin Tomic a sawisel.

Kum 2013 khan a training partner kut a thlak vangin Tomic hi thla riat chhung jail a lo tang tawh nge nghe.