Ozil-a'n hmasawnna tur ala nei - Lehmann

Arsenal goalkeeper hlui Jens Lehmann chuan a hnampui Mesut Ozil chu player ṭha tak ni mah se Premier League-a Arsenal champion pui tur chuan hmasawnna tur la neia a hriat thu a sawi.

Kum 2013 khan Real Madrid aṭangin Ozil hian pound maktaduai 42.2-in Gunners hi a zawm a, season liamta khan a club tan hian goal nga chiah a khung.

German goalkeeper chawlta Lehmann chuan, "Khawvelah player ṭha bik leh thiam bik tlemte an awm, chung zingah chuan Mesut pawh hi a tel. Amaherawhchu champion tur chuan ṭha taka a khelh tluan theih a pawimawh ang. Vawi khat chet ṭhat hluai ai chuan chet ṭhat tluan hi a pawimawh zawk, season thara Arsenal an champion theihna tur chuan Mesut hian chet chhiat lai bik nei loa a khelh ṭhat reng a pawimawh ang," a ti.

Season hmasa khan North London club Arse­nal hian EPL-ah point 75 hmuin pathumna an ni a, champion Chelsea chu point 12-in an phak lo. Season thar atan goalkeeper thar Petr Cech chu an elpui Chelsea aṭangin an lakluh tawh avangin champion turin beiseina an nei sang hle.