Nou Camp-ah Guardiola tan hmun a la awm - Laporta

Barcelona presidential candidate Joan Laporta chuan an manager hlui Pep Guardiola chu a duh a nih phawt chuan Nou Camp-ah a tan hmun a la awm thu a sawi. Hetihlai hian tuna an manager Luis Enrique chu season thara Barca manager a nih chhunzawm tur thu a sawi bawk.

July 18 khian Barca hian president thar an thlang leh dawn a, tuna president nilai Sandro Rosell leh Josep Maria Bartomeu bakah Laporta te hian he hmun hi an inchuh dawn avangin Laporta-a'n campaign au hla a au pui ṭan.

Kum 2008 khan Laporta president na hnuaiah Guardiola hian Catalan club hi a enkawl ṭan a, kum li hun a hman chhungin inelna zawng zawngah champion puiin nomawi 11 zet a lakpui hman a ni.

Barcelona president nih leh tum Laporta chuan Bayern Munich manager hi lak kir leh a hreh loh bakah an thiampuipa Lionel Messi chuan hmundang a pan loh tur thu a sawi bawk a ni. Messi hian season hmasa khan a club tan match 57 a khelh aṭangin goal 58 a khung nghe nghe.

Dan hremi kum 53-a upa Laporta chuan, "Pep nen hian ṭhian ṭha tak kan ni a, kan hnenah a lo kir leh duh a nih phawt chuan atan hmun a awm. Amaherawhchu sea­son tharah chuan Enrique-a'n min kaihruai dawn," a ti.

A vawi hnih nana presi­dent nih leh tum Laporta chuan, "Leo hi khawvela player ṭha ber a nih avangin ani hi chu kan hnena awm tur a ni. Ani hi season tharah pawh kan player pawimawh tur a nih avangin pawisa a lei theih a ni lo," tiin a star player chu chhuah tir a tum lo hle.