Neville-a'n hna thar a zawm

Manchester United leh England defender hlui Phil Neville chuan Valencia assistant manager hna chu Thawhṭanni khan a thawk ṭan.

Kar liamta khan Champions League qualifying khel tur La Liga club Valencia chuan kum 38-a upa Neville an lak luh thu an puang a, hetih hunlai hian Phil hian an la inremfel chian loh thu a sawi thung.

Neville hi Valencia boss Nuno Espirito Santo hnuaiah a thawk dawn a, United youth system chhuak hian David Moyes-a'n Manchester United a enkawl chhung khan first team coach-ah a lo ṭang tawh bawk.

United leh Everton defender hlui hian England tan vawi 59 a inlan tawh a, kum hnih liamta khan ram tana khelh a chawlhsan. Gary Neville-a nau hi England Under-21 enkawltu zingah a lo tel tawh bawk.

Spanish club Valencia neitu Peter Lim hi England-a non league club Salford City neitu zingah a tel a, he club neitu zingah hian Phil bakah Ryan Giggs, Gary Neville leh Paul Scholes te an tel bawk.