Dunga-a'n Neymar hremna khing lo turin a ti
Brazil head coach Dunga chuan Brazilian Football Confederation (CBF) hnenah 2015 Copa America aṭanga Neymar hremna chu khing let lo turin a ti.
Copa America group match hnuhnung bera Brazil leh Colombia inkhelh ṭumin hun tawp hnuah ṭul lo taka ball a pet vangin captain Neymar hi hnawhchhuah a ni. International Match li khel lo tur a hrem zui a ni bawk.
Barcelona star hian ram tan match hnih a khel lo tawh a, World Cup qualifying match hnih dangah a inlan thei lo bawk ang. Player-in hrem an tuar a nih chuan South America Football Governing Body CONMEBOL hnehah hremna ti nep tur leh sut tir tura khin let theih a ni ṭhin.
CBF general secretary Walter Feldman chuan, "Dunga-a'n kan rama football thuneitu sang hnenah Neymar hrem chu ṭha a tih thu a sawiin hremna chu khing let lo turin min ti a ni," a ti. Hetiang a nih avang hian CBF-in khin let sak an tum pawh an ṭhulh leh phah a ni.
Sawi chhunzawmin Feldman chuan, "Hetiang thutlukna siam hi a harsa deuh ṭhin, thutlukna dik a ni nge ni lo chu nakinah kan la hria ang chu. Hrem ngai an awm a nih chuan hremna chu a hmachhawn a ngai a ni mai," a ti bawk.
Brazil hi Chile-a neih zawk tak Copa America quarterfinal -ah Paraguay hneh loin an tla a ni.