Alderweireld vangin Saints leh Atletico buai

Southampton chuan Atletico Madrid aṭanga loan-a an hawh mek Toby Alderweireld a ngheta lakluh an tumna kawngah buaina an hmachhawn a ngaih hmel.

Nikum nipui lai khan Saints hian Atletico Madrid aṭangin Belgium defender Toby Alderweireld hi loan-in an la lut a, Spanish club nen hian an inrem dan chuan Southampton hian an duh chuan season tawpah pound maktaduai 6.8 in a nghetin an la lut thei ang tih a ni. He an inremna hi Atletico hian thaichhiat leh an duh a nih chuan pound maktaduai 1.5-in an player hi an la let leh thei ang tih a ni bawk.

Season hman zawh takah Alder­weireld a che ṭha ta si a, club hrang hrangin lakluh tumin an bia. Atletico Madrid tan Saints laka an hralhna man zat aia tam pawha hralhna tur a tam avangin an inremna thaichhiata lak let a fin thlak. Mahse, Saints chuan Atletico hian an inremna thaichhe turin deadline an pel tawhah an ngai a, Spanish club lian hian laklet ngei an tum thung avangin club pahnih hi an la buai thui viau maithei.

Belgium tana vawi 43 inlan tawh defender hi Tottenham leh Manchester City chuan an club lama sengluh an duh ve mek nia sawi a ni.