Fan-te'n De Gea hi an ngaidam thei lo ang - Ujfalusi

Atletico Madrid defender hlui Tomas Ujfalusi chuan David de Gea-a'n Real Madrid a zawm chuan amah chherchhuaktu club phatsanna a ni dawn a, supporter-ten an hrethiam thei lo ang.

De Gea hian kum 13 leka upa a nihin Rojiblancos (Atletico Madrid koh duatna) hi a zawm a, Europa League leh European Super Cup-ah te a chawmpion pui hnuin Manchester United a zawm.

Czech Republic international chawl ta Ujfalusi chuan, "An ngaihdam thei lo ang, ka chiang a ni. Tuna Real Madrid zawm a tum hi mimal tak pawhin mak ka ti. Atletico Madrid fan a ni a, Atletico kutchhuak a ni bawk. Tuna a thutlukna siam tur hi chu siam a harsa ve khawp ang," tiin 2008 aṭanga 2011 thleng Atletico keeper chuan a sawi.

Ujfalusi chuan sawi zelin, "Arsenal goalkeeper Petr Cech leh Chelsea goalkeeper Thibaut Courtois aiin ka mitah chuan a ṭha zawk a, kum hnih aia tam kan thawh ho tawh avangin ka hrechiang a ni. United-ah bul ṭan ṭha lo mah se tunah chuan a theihna ang te a lanchhuah tir tawh," tiin De Gea a fak.