Pirlo-a'n New York City a pan

Juventus midfielder rinrawl Andrea Pirlo chuan free-transfer-in Major League Soccer club New York City FC a zawm ta.

Kum 36-a upa midfielder hian Juventus-ah kum khat cham turin contract la nei mah se club nen inbe remin Turin khaw club hian an chhuah zalen a, kum hnih leh a chanve cham turin New York lam hi a pan ta a ni.

Italy tan vawi 115 a inlana goal 13 khungtu Pirlo hi Chelsea midfielder hlui Frank Lampard leh Barcelona striker hlui David Villa te nen New York City Fc-ah hian an khel ho dawn a, hei hi khawvel mipui hmuh chak a ni.

Pirlo leh New York City FC te hi inbe fel tawh mah se club lam hian official takin July 21-ah an lakluh dawn chauh avangin Pathianni a New York leh Toronto FC an inkhelh hunah a la inlan thei dawn lo a, Yankee Stadium-a inkhel tur hi New York City FC tana Lampard-a game hmasa ber tur a ni ang.

Juventus-a kum li a cham chhunga Serie A nomawi vawi li lai chawi tu Pirlo chuan, "Italy pawn lam aṭangin min sawmtu tam tak an awm a, chuti chung chuan New York lam pan tur hian ka inngaihtuah buai lo," a ti.

Kum 2006 World Cup champion Italy team-a an midfield innghahna Pirlo chuan sawi chhunzawmin, "New York City FC hi club hmasawn tum leh keimah ang bawka hlawhtlinna beiseia tuihal an ni a, hnehna chang turin he hmunah hian ka lokal a ni," tiin hlawhtling tura US club chu pan a nih thu a sawi.

Italian club Brescia-a bul ṭantu Pirlo hian Serie A club lian ber pawl pahnih Inter Milan leh AC Milan-ah te a hun a lo hmang tawh ṭhin a, Milan tana a khelh chhung hian Serie A title pahnih leh Champions League title pahnih a lo chawi tawh bawk.

Juventus tan game 164 a khelha goal 19 a khung zinga free-kick vawi 15 lai pet goal tu Pirlo hi Juventus pawhin a thlahna thuchhuah an tichhuak ve nghal a, "Pirlo hi player danglam bik leh ropui a ni a, a thiamna hi statistic hmanga hrilhfiah chi a ni lo. A chhehvela player dangte ti phur thiam tak, field lai tak aṭanga inkhel khaikhawm ṭhintu a ni. Season li lai hun kan hmang ho thei kha kan club tan chuan chawimawina ropui tak a ni. Engkim avangin a chungah kan lawm a, duhsakna kan hlan a ni," tiin an player ropui an thlah.

Pirlo-a'n MLS a pan leh tak avang hian football ngainat lohna ram USA-a league sang berin ngaihven a hlawh chho a, khawvel huapa footballer langsar tak tak Kaka, Lampard, David Villa leh Steven Gerrard te ho an awm ta bawk nen MLS hian khawvel ngaihven a hlawh chho dawn chauh niin a lang.