Khawvel rawlthar player hlu ber Sterling
Tun hnaia Soccerex-in footballer kum 21 hnuailam te hlutna zirchianna a tihchhuahah Liverpool winger Raheem Sterling chu rawlthar player zinga hlu berah ngaih a ni.
Zirchiannaah hian kum 21 hnuailam player te hlut zawng hi tehna hrang hrang a zirchian a ni a; an kum zat, an khelhna position, contract sei zawng, football market-a an man zat, ram tana khelh zat, minute khelh zat, goal khung zat, inhliam zat leh an thiam dan aṭang tea teh a ni.
Soccerex zirchianna in a tarlan dan chuan Liverpool-in pound maktaduai 50 man an chhiar Sterling hi pound maktaduai 35 man hu a ni a, kum 21 hnuailam player zingah a hlutna hi a sang fal hle.
English winger Sterling hi Paris St-Germain player Marquinhos-a'n a hnaih ber a, Brazilian defender hlut zawng hi pound maktaduai 28.8 nia chhut niin Manchester City hel lai Sterling a phak lohna ni pound maktaduai 6.7 vel lai a ni.
Manchester United-in pound maktaduai 31-a PSV aṭanga an lei thar Memphis Depay chu pathumnaah a awm a, Dutch winger hlut zawng hi pound maktaduai 23.9 nia chhut a ni.
Soccerex-in kum 21 hnuailam player 20 te hlut zawng a tarlanah hian Liverpool-in player an thawh hnem ber a, Sterling bakah hian pound maktaduai 12.2 hu nia an chhut 15-na Emre Can leh season thar aṭanga Liverpool tana inlan tur pound maktaduai 10.9 hu nia an chhut Belgian striker Divock Origi te an lang bawk.