Coach ni tura rahbi hmasa ber AIFF D Licence
Mizoram Football Association chuan July thla tawp lam hian Aizawlah All India Football Federation 'D' License Coaching Course a buatsaih dawn.
D Licence?
India rama professional football coach ni tur chuan AIFF D-Licence neih a ngai. D-Licence nei lo tan AFC C-Licence Course a zir theih tawh loh.
D-Licence-ah hian coach zia, coaching kalphung, football kalhmang bul ṭhut, training session huaihawt dan, ei leh in chungchang, player leh coach puite biak pawh dan, football dan (laws of the game), kum bithliah hrang hranga naupang nun phung, warm up lak dan, field tea inkhelh dan (small-sided games) leh nuam taka training neih dante zirtir an ni.
I League club enkawl turin AFC A-Licence neih a ngai a, Mizo zingah an awm lo. I League second division club kaihruai thei tur AFC B-Licence nei coach erawh tlem a zawng an awm tawh.
C-Licence nei tan AFC Goalkeeping Course a zir theih a; AFC Conditioning Course B-Licence neih a ngai a; Coaching Instructors ni turin AFC Instructors Course a zir theih a, A-Licence neih ngei ngei a ngai bawk.
A tawi zawngin tun dinhmunah football coach hmanga eizawng duh tan chuan AIFF D-Licence hi rahbi hmasa ber a ni a. D-Licence nei hian dan ang thlapin MPL club bakah Grassroots football an enkawl thei a, zirna sang zawk zir zel theihna a ni bawk.
Aizawlah D-Licence
AIFF D-Licence hi neih hun tur bik ruat a ni lo a, he course kalpui tur hian State Association-in AIFF-ah dilna thehluh a ngai.
India rama football thuneitu sang hian course kalpuina senso hi State Association-in course fee aṭanga hmu let turin a beisei.
June 15-17 chhung khan East Bengal ground, Kolkata-ah Football Players Association of India (FPAI)-te bultumin D-Licence course buatsaih a ni a, course fee atana pawisa ngai zat chu Rs 10,000 niin kalna leh hotel thlenna senso a tel lo.
Mizoramah erawh MFA hmalaknain course fee-ah Rs 4000 lak a ni dawn a, seat erawh a tam lo thung. Seat 30 aṭanga seat 16 chu District FA leh Mizoram Premier League Club ten an chang a, aiawh an tir vek chuan seat 14 chiah a bang tawh.
D-Licence-ah Bhaichung?
Kolkata-a D-Licence course neih zawh takah khan India captain hlui Bhaichung Bhutia, Renedy Singh, Sandip Nandy, C S Sabeeth, Abhijit Mondol, Israil Gurung, N S Manju, Chika Wali leh player ṭha dang an tel a, Mizo midfielder ṭha Samson Ramengmawia leh Rohmingthanga te an tel bawk.
Shillong Lajong captain hlui Samson chuan, "Professional player dang nena zir kan ni bawk a, kan zir belh nasa khawp mai. Mama hi TFA Academy chhuak a ni a, khelh ho ṭhin tho mah ila awmze neia zir a ni tih hi field chhungah a lang ṭhin. Coaching ṭha zawka pe turin coaching course kal hi a pawimawh a ni," tiin Vanglaini palai a hrilh.
I League-a Aizawl FC kaipuitu Rohminga chuan, "Thil ho lam deuh turah ka ngai a, ka hlawkpui khawp mai. Mizorama neih turah pawh hian la thutak se ka ti hle. Licence nei coach an tam chuan Mizoram football hian nasa takin hma a sawn thei dawn a ni," tiin a sawi.
Rohminga hi Aizawl FC player a nih bakah Lengpuia Aizawl FC academy a enkawl tel bawk. Midfielder ṭha pahnih hian Imphal, Manipur-ah AFC ‘C’ Coaching Course an chhim leh mek.