Wimbledon Last 16 an zo ta; Murray leh Federer kal zel

Tennis atchilhna ram England-ah khawtual tlangval Andy Murray chuan Thawhlehni zan khan Ivo Karlovic a hneh. Vawi sarih champion tawh Roger Federer pawh Wimbledon quarterfinal a inhlangkai.

Kum 2013 champion, seeded pathumna Murray hian Centre Court-ah darkar thum leh minute thum chhungin 7-6, 6-4, 5-7, 6-4 in Karlovic lakah hnehna a chang.

Kum 36-a upa Karlovic hi feet ruk leh inches 11 zeta sang a nih avangin a service a ṭha hle a, vawi 29 zet ace a siam thei. Hetih lai hian Murray erawhin vawi riat chauh ace a vaw chhuak thung. Mahse, a service a hum ṭhat bakah inkhel a thunun zawk avangin Murray hi a tawpah chuan a dingchang ta zawk tho.

Kum 29-a upa Britain number 1 Murray chuan, "Karlovic khan ball kha a vaw na em em mai a, ka tan chuan a harsa hle. Muang changa kan inkhelh theih nan ka theih tawpin ka speed ka ti hniam lui a, chu chu ka chak theihna chhan niin ka hria. Tournament lianah chuan kan khingpuite ṭhatna lai ber bei let thei turin thutlukna kan siam fel vat a ngai thin," a ti.

Wimbledon kan sawi apianga sawi hmaih theih tawh loh tur Federer chuan last 16 paltlang turin harsatna a tawk lem lo. A vawi 13-na atana quarterfinal lut turin Roberto Bautista Agut chu minute 87 chhungin 6-2, 6-2, 6-3 in a hneh.

Semifinal lut turin seeded pahnihna Federer hian Gilles Simon a hneh leh phawt a ngai ang. Wimbledon champion tam ber record siam turin kuminah hian hun ṭha a nei mek a, vawi sarih champion tawh Pete Sampras leh Willie Renshaw te record hi a khum turin vawi khat champion bak a mamawh tawh lo.

Kum 33-a upa Swiss superstar hian set khatna leh set hnihnaah Agut-a service vawi hnih ve ve a chhuhsak bakah set hnuhnung berah vawi khat chhuhsak bawkin hnehna a chang chiang hle. World number 2 Federer hian tun tournament-ah hian a service ala hloh miah lo a, ani chiah mahni service la hum vek thei a ni nghe nghe.

Grand Slam vawi 17 champion tawh Federer chuan, "Record siam hi ka ngaihtuah ngai lem lo, a chhan chu chak tura pawimawh ber zawk chu ka inkhelh leh tura rilru pek a ni zawk. Tun tournament-ah hian ka service hi ni dang aiin na fal lem lo mah se ka duhnaah ka vuak theih avangin ka la hum thei zel a ka lawm hle," tiin a sawi.

Mipa inkhel dangah Federer-a hnampui Stan Wawrinka chuan quarterfinal lut turin David Goffin chu inkhel inhnehtawk takah 7-6, 7-6, 6-4 in a hneh. French Open champion Wawrinka hian Richard Gasquet a hmachhawn leh ang.

Unau inkhel

Thawhṭanni zan khan Wimbledon last 16 chu khelh zawh a ni a, seeded pakhatna Serena Williams chuan a unau Venus Williams hnehin quarterfinal a inhlangkai.

Kum ruk hnuah Grand Slamah Williams unau hi an inkhel leh a, darkat khat leh minute riat chhung lekin world number 1 Serena-i'n 6-4, 6-3 in hnehna a chang.

Kum 33-a upa Serena hi a u Venus ai hian kum hnihin a naupang zawk a, an unaua an intawn vawi 26-ah vawi 15 hnehna a channa chiah a ni nghe nghe.

Third round-a British star Heather Watson a hneh hnuah Centre Court-ah Serena hian a unaunu laka a ṭhat zia a lantir nawn leh a, a service a hum ṭhat bakah set khatna leh set hnihnaah Vennus-i service a chhuhsak ve ve a ni.

Serena hian inkhel bul a ṭan ṭha hle a, point ruk a hmuh zawn bakah ace vawi 10 zet a siam. Double faults nei miah loin vawi 13 chauh unforced errors a nei bawk. Hetihlai hian Venus erawh chuan vawi li ngawt double faults a neih bakah vawi 12 unforced errors a nei bawk.

US, Australian leh French Open champion lai Serena chuan, "Kan hmangaih takte nen kan inkhel a nih chuan thil hi a awlsam ngai lo. Mahse infiamna a nih avangin thianghlim taka kan inel a ṭhul a, hun hlimawm tak kan hman dun thei kha ka lawm hle," tiin a sawi. Williams unau hi Wimbledon-ah vawi ruk an intum tawh a ni.

Inkhel dangah Maria Sharapova chuan straight set-in Zarina Diyas a hneh. Tun tournament-a match li a khelh tawh aṭangin Sharapova hian set khat mah a la hloh lo.

A vawi hnih nana champion leh tum seeded palina Russian kum 28-a upa Sharapova hian world number 34 Diyas chu minute 97 chhungin 6-4, 6-4 in a hneh a ni.

World number 1 hlui Caroline Wozniacki vanduai­na ala kaltluang zel a, a zawna a vawi nga nan quarter­final thleng zo loin a tla leh. Third round-ah Angelique Kerber a barakhaih hnuah seeded 20-na Garbine Muguruza chuan darkar khat leh minute 32 chhungin seeded 5-na Wozniacki chu 6-4, 6-4 in a hneh leh a ni.