Liverpool no. 7 thar James Milner

Premier League club Liverpool chuan Manchester City aṭanga an lakluh James Milner chu jersey no. 7 an hak tir dawn.

Club tinin jersey number roh bik an nei ṭhin a, Liverpool tana jersey no. 7 lo ha tawh zingah player ropui tak tak an tam hle. Reds tana no.7 ha hnuhnung ber tu chu Barcelona forward ni ta Luis Suarez a ni a, Uruguayan striker hma hian Kevin Keegan, Steve McManaman leh Kenny Daglish te'n jersey no. 7 an lo ha tawh ṭhin a, Liverpool chanchina player hriatreng tlak vek an ni.

Liverpool jersey number roh ber pawl a hak avangin Milner a zam lo, Manchester City-ah pawh jersey number 7 hatu English midfielder chuan, "City-ah khan no.7 ka ha a, Liverpool te ang club ropuiah chuan eng jersey number pawh ha ila player ropui tak tak hak hnu vek an ni. Number 7 hi he club tan chuan a hlu tih ka hria a, player hlu tak ni thei tura ka khelhchhuah theih ngei ka inbeisei. He jersey ropui tak ha chunga match tam taka chak ka duh a ni," a ti.

Kum 29-a upa Milner chuan Liverpool a pan chhan sawiin, "Match tam zawk inkhelh ka duh a, a theih chuan nuam ka tih berna central midfield-a khelh ka duh. Manager pawhin central midfield-a khel tura min duh thu a sawi a ni," tiin a career tawp lamah a duhna tak position-a khelh a chak thu a sawi.

Manchester City-a a khelh laia right winger ṭhin Milner hian City tan Premier League title vawi hnih, FA Cup leh League Cup vawi khat ve ve a chawi a, kum nga a cham a ni.