Ram mipui ṭan rawn Hamilton

Mipui 140,000 chuang zet hmaah Lewis Hamilton chuan Pathianni khan British Grand Prix-ah hnehna a chang a, anmahni ramah ngei hnehna a chang chu thua sawfiah theih loh khawpa lawmawm a nih thu a sawi.

Silverstone tlankawngah Pole position aṭangin bul ṭan mah se bul a ṭan fuh lo vangin Williams driver pahnih Felipe Massa leh Valtteri Bottas te'n an tlan pel nghal a, amaherawhchu lap hnuhnung ber an tlan meuh chuan tuma tluk lohin Lewis hi a tlan fal leh thei tawh.

Mercedes driver hian tun season-ah vawi nga hnehna a channa niin, an mahni ramah hian kum 2008 khan McLaren car khalh chungin hnehna a chan tawh bakah Mercedes car khalh chungin nikum khan hnehna a lo chang tawh bawk.

An ram mipuiin an lawmpui dan chu mak a tih thui sawiin Hamilton chuan, "Kan ramah hian infiamna hi mitin mai hian kan ngaina tih chu ka hria, mahse khatiang em em a tam mipui kha min ṭan turin an lo kal khawm ang tih ngaihna ka hre lo zawk. Ka tan chuan a ropui thlawt a ni," a ti.

Sawi chhunzawmin kum 2008 leh 2014 world champion Hamilton chuan, "Ka lawmna hi thua sawifiah theih chi a ni lo zawk ang, ka hmel hi en ula ka hlim zia chu in hre mai ang. Lap hnuhnung ber ka tlan lai phei kha chuan ka hnuk a ulh hial, ka hlim a ni. Khatiang baka inchawimawina kha a awm thei chuang lo ang" tiin a sawi.