Klitschko hmaa ding tur Tyson Fury

British heavyweight boxer Tyson Fury chuan October 24 khian Ukrainian heavyweight boxer rothap Wladimir Klitschko a hmachhawn dawn.

Kum 26-a upa Fury hian vawi 24 a inhnek tawhah chak loh hmel a la hmu lo a, vawi 18 lai a khingpuite a knock-out thei. October-a a inhnek pui tur Klitschko erawh awlsam taka hneh tur chi a ni lo. Kum 39-a upa WBA, IBF leh WBO heavyweight title kawl mektu Wladimir Klitschko hian kum 11 chhung chu chak loh hmel a hmu tawh lo a, vawi 67 mi a inhnek pui tawhah mi 53 lai chu a knock-out tawh a ni.

Feet 6 leh inches 9 laia sang Fury a phur tawh a, "Klitschko nena kan inhnek tur hi Heavyweight boxing chanchina inhnek ropui ber tur a ni dawn a, ka nghakhlel tawh takzet a ni. Klitschko hi awlsam takin ka tukdawl ang," tiin a vau pung a ti na hle.

Manchester khawchhuak boxer hian March thla khan London-ah a European heavyweight title chu Romanian boxer Christian Hammer lakah a lo humhim tawh a ni.

Klitschko tan Fury nena an inhnek tur hi vawi 28 heavyweight title inchuha a inhnekna tur a ni a, hetiang anga tam hi Heavyweight title inchuhna inhnekah boxer dang an la inlar ngai lo. A ṭum hnih nana World Heavyweight champion a nih hnua a title humhim a tum ṭum 19-na tur a ni bawk ang.

April thlaa Bryant Jennings a hneh hnu lawkin Klitschko hian Fury hnek tura a inpeih thu a lo sawi tawh a ni.