Barca player thar Turan

Season hman zawh taka treble champion Barcelona chuan Atle­tico Madrid aṭangin mid­fielder Arda Turan an la lut. Catalan club hian Turan manah hian pound maktaduai 24 an seng a ni.

Kum 28-a upa Turkish midfielder hi Premier League club lian tak tak Chelsea, Liverpool leh Manchester United te nen sawi zawm ni hman mah se Spanish champion lam hi a pan dawn ta zawk a ni.

Turan hian Barca hi zawm mah se nakum January hma chu a club thar tan hian a inlan thei dawn lo. Barcelona hi kum 18 hnuailam player an lak dan dik loh avangin FIFA chuan a hrem mek a, player thar la lut thei mah se hrem an nih chhung chu an player thar te hi an chhawr thei lo a ni.

Turkey tana vawi 81 lai inlan tawh Turan hian kum 2011 khan Gala­tasaray aṭangin Atletico Madrid a zawm a, kum li a cham chhungin goal 22 a khung bakah a ṭhiante thun tur vawi 32 a siam sak.

Barcelona hi club president thar thlang tura inbuatsaih mek an nih avangin president neiloin an awm mek a, president awm loh chhungin spe­cial commission chuan transfer vel hi an khawih. President thar an neih hunah president hian Turan hi a player duh­zawng a nih loh chuan Atletico lamah an leina aia 10% a tlawm zawkin an hralh let leh thei dawn a ni.