Final-a chak loh aia na a awm lo - Messi
Argentina captain Lionel Messi chuan Copa America final-a Chile an hneh lo chu hrehawm a tih thu a sawi chhuak a, ram mipui ṭawiawmna ṭha an dawn avangin lawmthu a sawi tel bawk.
Messi chuan, "Final-a chak lo aia na hi a awm lo. Chutihrualin hun harsa kan hmachhawn pawha min ṭan tlattu supporter-te chungah hian kan lawm takzet a ni," tiin a official facebook page-ah a ziak.
Santiago-a final khelh ṭum khan stadium-a inkhel en Messi chhungten beih an tawk a, Argentina press ṭhahnem takin an football team hi an sawisel bawk.
Kum 28-a upa Messi hian Copa America match hmasa bera Paraguay an draw ṭumin man of the match chawimawina a hnawl a, Spain lama report ṭhenkhatah chuan Barcelona star hian best player chawimawina a hnar leh niin an ziak.