Atletico Madrid an mualpho

Season duhawm lo tak hmang mektu Atletico Madrid an harh chhuak hleithei lo a, Copa del Rey lamah an mualpho leh ta - third division club-in an pet chhuak!

Cultural Leonesa khelmualah Diego Simeone-a'n chak loh a inring lo a, Argentine coach hian third division club lakah league lama inlan tam lo rual a chhawr.  Atletico hian goal khung turin an nghah rei a ngai hle. Minute 62-naah Angel Correa chuan he inkhela goal hmasa ber a khung a, chak mai tura ngaih an ni.

Mahse, mahni muala khel third division club tan Julen Castaneda chuan hun tawp nan minute sarih chauh a awm tawh tihin si phurh sutna goal a rawn khung! Extra time khelh zui a ni a, a mak tawlh tawlh - minute 108-naah Julen Castaneda chuan goal a rawn khung leh a, Atletico lamin a chhanletna tur an neih loh avangin 2-1 in an tlawm a, Copa del Rey round of 32 aṭangin petchhuah an ni.

Spanish third division-a Atletico Madrid B team te nena khel ho Leonesa tan French goalkeeper Lucas Giffard a che ṭha takzet a, save engemawzat a neih chu a team chhanhimtu a tling. Atletico hian 2011 khan Albacete chu Copa del Rey-ah hian an ngam lo a, hetihlai hian Simeone chu coach a la ni lo - tun hi Argentine coach an neih hnua division hniam zawk club laka Copa del Rey-a an tlawm hmasak ber a ni zui. Spanish La Liga-a pathumna ni mek Atletico Madrid hian Pathianni zan dar 4:30-ah league match an khel zui dawn a, Leganes an mikhual ang.