MPL12-ah 'star' thar

GIG Motors MPL12-ah goal 42 a lut tawh a, star thar an piang dawn. Aizawl FC striker Zomuansanga leh MLS FC midfielder M. Lalpektluanga ten goal nga ve ve an khung tawh a, player talent nei ṭha pahnih tan tun season hi an hming chher ṭanna tur a ni thei ang.

Khawbel tlangval Zomuana hi MPL-ah mi thar a ni tawh lo a, I League thlengin a khel tawh. Mahse, Aizawl FC-ah Lalrinzuala leh C. Lalhriatpuia te an awm avangin khelhna hmun a chang meuh lo a, MPL11-ah goal a khung lo. Nipui bazarah Rinzuala'n NE United a zawm a, Hriata season tira a inhliam bawk avangin Zomuana tan hun ṭha a inher chhuak. Khawbel tlangval hian Police lakah hattrick a siam a, Saikhamakawn lakah goal hnih hlu bik a khung leh bawk.

MLS midfielder rinrawl M. Peka hian Chhinga Veng tan MPL-ah a inlan tawh a, MPL12-ah hming rawn chher hle. Lunglei Farm Veng tlangval hian match thumah goal a khung vek a, Saikhamakawn lakah hattrick a siam. M. Peka hian midfielder ni chungin goal nga a khung tawh a, penalty aṭangin goal thum khung mah se MLS khaipa a ni a, a hnathawh hi a ropui hle.

Kanan FC tana goal thum khung tawhtu Lalthanzuala (TZ-a) hi goal khung thei bik player a ni a, season liam ta khan Chawnpui tan khelin season pumin goal thum a khung. Mizoram hmeichhe team enkawl tawhtu Darzo coach Lalrozara'n Lungleia striker chhuak thar ṭha ber tiin a sawi tawh a, a thusawi dikna a lang chho ṭan.

MPL-ah player thar chhuak thar an awm nual dawn a, chanchin ngaihnawm a awm chho dawn. MPL12-ah goal 42 a lut tawh a, own goal la awm miah loin player 29-in goal an khung tawh a ni.