Guardiola-a'n min ring - Donnarumma

PSG aṭanga Manchester City zawmtu goalkeeper Gianluigi Donnarumma chuan Pep Guardiola-a'n a rin thu a sawi a, Italian goalkeeper hi Manchester Derby aṭangin a club thar tan hian bul a ṭan a rinawm.

Kum 26 mi Donnarumma chuan, "Dik taka sawi chuan Manchester City zawm ka duh. City pawhin min duh a, min lak tumin theihtawp an chhuah. Guardiola-a'n min reng a, City tana khel turin min duh a, ka lawm hle. Club lian tak zawm thei hi ka inchhuang a ni," tin a sawi.

Man City hian tun season Premier League-ah match thum khel tawhin Wolves an hmachhawn ṭumin goal chhuah lo mah se match hnuhnung pahniha Tottenham leh Brighton an hneh loh ṭumin goal hnih ve ve an chhuah. Pep-a hote hian September 14, Pathianni zan dar 9:00 hian Manchester United an mikhual dawn a, Donnarumma hi inlan nghal thei dinhmunah a ding.

Donnarumma hian City zawm tawh mah se ram tana khel tura koh a nih avangin Italy team zingah a awm mek a, Gennaro Gattuso kaihhruai team hian September 5, Zirtawpni zanah Estonia an mikhual dawn. Azzurri hi World Cup khel tur zawnnaah group I-ah Norway, Israel, Estonia leh Moldova te nen an awm ho a, match hnih an khelh tawh aṭangin point thum an hmu tawh a ni.