Djokovic hmaah Alcaraz
Novak Djokovic chuan US Open semifinal a lut, final lut tur chuan Carlos Alcaraz a paltlang leh a ngai dawn - player ṭha bik pahnih inkhel hi a hmuhnawm dawn, pakhat zawk zinkawng a tawp dawn a ni.
Serbian star Djokovic hian tualchhung tlangval Taylor Fritz chu 6-3, 7-5, 3-6, 6-4 in a hneh a, vawi li a champion tawhna hmunah nomawi chawi leh turin kawng dik a zawh a, vawi hnih chak a la hmabak.
Quarterfinal inkhel dangah Carlos Alcaraz chuan Jiri Lehecka chu 6-4, 6-2, 6-4 in a hneh va thung a, tun hma lama a lo hlawhtlin tawhna hmun a nih avangin inrintawkna pawh a nei sang, final lut zawk nih ngei a tum ang.
Djokovic a fal
Arthur Ashe Stadium-ah mipui an khat tlat a, tualchhung tlangval Fritz chuan ṭantu a ngah hle - mahse, a hma a ding chu Djokovic a nih miau avangin atan tih theih a awm lo, vawi 11 an intawn tawhah Djokovic a chak fai vek.
Seeded pasarihna Djokovic chuan, "Set hloh loin ka tlang ngei mai, inkhel awlsam tak erawh a ni lo thung. Set hnuhnung pahnih kha ka khel fuh ve hle a, chutiang chung pawh chuan ka chungnung zawkna kha a tam lo," tiin a sawi a, a khingpui a dahsang thiam hle.
Djokovic hian Grand Slam nomawi 24 a la tawh a, a la duhtawk mai lo - a elpui ni ṭhin Roger Federer leh Rafael Nadal te an chawlh hnuah pawh a la inkhel chhunzawm zel a, major title 25-na la turin vawi hnih chak a la hmabak.
Serbian star Djokovic hi kum 38 mi a ni tawh, semifinal-a a khingpui tur Alcaraz aiin kum 16 laiin a upa zawk! A vanglai pel deuh tawh mah se theihna sang tak a la nei a, tawnhriat a ngah avangin inelna boruak sangah chuan a buk rit zinga mi a la ni reng.
Alcaraz a hriam
Carlos Alcaraz hi kum 22 mi chauh la ni mah se a hriam ṭha hle a, Grand Slam vawi nga champion a nih tawh avangin tawnhriat pawh a nei ṭha tawh viau - US Open 2022 khan a lo champion tawh, tun ṭumah hian a vawi hnih nan hlawhtlin a tum.
Spanish tlangval Alcaraz chuan, "Quarterfinal match bik chu duhthusam a ṭhain ka khel,, hmasawnna tur erawh ka la nei tho. Grand Slam inelna tawp lamah set hloh loa ka chak thei a nih chuan lungawi a ngai, hmabak erawh a awlsam dawn lo," a ti.
Alcaraz hian Djokovic lakah sulhnu a nei ṭha, vawi riat an inhmachhawn tawhah vawi nga chakin record a nei ṭha zawk; mahni inveng chunga khingpuite nawr let hiam an ni a, service an neih ṭhat bawk avangin an inkhel hi a hmuhnawm ngei ngei dawn tiin a sawi ngam.
Seeded pahnihna Alcaraz chuan, "New York khawpuiah hian inkhel hmuhnawm chhawp chhuak turin ka kal a, mipui te tennis hmuhnawm tak an en theih nan theihtawp ka chhuah dawn, hnehna chan chauh ni loin match ropui khelh a pawimawh," a ti.